16.10.17

Os transportes en Filipinas: jeepneys, uvs, tricycle, metro, uber-grab, taxi, buses

Tricycle

Hue somos en vaca por Filipinas. Y ye que os treballadors d'o sector d'os transportes han aturau por hue ya que o gubierno filipino quiere empentar una serie de midas ta solucionar o problema d'o trafico -un d'os más grans problemas por aquí- y muitos creyen que perderán o suyo treballo. En un país y en una ciudat anque no se vive en as carreras, sino que istas nomás son espacios de circulación y mercau, iste ye un candalieto. Asinas que, qué millor diya ta charrar d'os transportes en Filipinas? 

Prencipiaré por o más iconico y popular de totz: o jeepney. O jeepney ye una adaptación
d'os jeeps militars que trayoron os americanos mientras a suya colonización y a segunda guerra mundial. Asinas, fa as veces d'una furgoneta gran u un bus chicot an que i ''cullen'' bellas 30 personas -bien pretas y seguntes os estandars de grandaria filipinos, que ya comentaré en atro post. Por toda Filipinas, os jeepneys fan distancias medias, y en o caso de Manila, as distancias y rutas propias d'un bus. Por os laterals y en o parabrisas tienen colorius carteletz anque indican o camín que fan. Dentro, i tienen dos ringleras concaradas, an que te posas como puetz, en un ambient calient y cargau, parixendo que en una d'istas habrás de baixar-ne ta luitar contra o enemigo en o desembarco de Normandía. Os suyos motors viellos son rudiosos y continaminan una ripa, y seguntes m'han dito, encara que son un icono d'o estau, o gubierno quiere ir acorando-los china chana. Cal decir antimás que, encara que fan rutas, no tienen paradas estableixidas, sino que los aturas quan te los trobas, te'n puyas y dimpués quan quiers le dices a o conductor que quiers baixar-ne. Como curiosidat, isto en tagalo se diz 'para' -parola pillada d'o espanyol- y si quiers estar más educado, se diz 'para po' -para señor.

Una versión más moderna d'os jeepneys son os UVS. Son furgonetas que fan as veces d'o jeepney y anque i ''cullen'' bellas 14 personas, atra vegada seguntes os estandars de grandaria y de seguridat filipinos. Os UVS son más caros -bells 30 centimos d'euro o trachecto que en un jeepny ye de 15- pero tamién más comodos: quasi como taxis comunals. A suya gran avantalla, sin dubda, ye que tienen aire acondicionau. Y ixo s'agradeix una ripa en Filipinas, y más que más en Manila. Cal decir que yo nomás los he vistos en Manila, mientras que en a resta de Filipinas, ta fer ista mena de medias distancias no bi ha que jeepneys. 

Si lo que queremos ye fer aproximacions u distancias chicotas, o medio más popular ye o tricycle, como lo que bi ha en a primera foto d'iste post: una mena de sidecar que tien licencia ta saltar-se todas as normas de trafico -bueno, aquí tot o mundo tiene licencia ta saltar-se-las fueras d'en os vicos de Malate y BGC, pero os tricycles encara más. Si yes un maniatico con a seguridat, siento decir-te que iste no ye o tuyo medio de transporte. Si te fan goyo as emocions fuertes, alavez te ferás adicto a ell. 

Y Manila no tien metro? Bueno, no exactament. A ciudat ye sobre esters, galachos y
terrenos febles que ascape s'engaronan quan i pleve, asinas que a construcción de lineas de metro baixo tierra, si bien s'ha estudiau varias vegadas, perén s'ha visto inviable. Pero sí que tiene tres líneas de metro elevau -que ells dicen tren- y que fan una mena de trianglo por buena cosa de l'area metropolitana. Funciona prou bien, y sin estar o millor metro d'o mundo, ta yo ye dentro d'os estandars normals en una ciudat occidental, por comodidat, calidat y horarios. O pre d'o pasache ye d'entre 30 y 55 centimos d'euro. Agora bien, con a masificación que bi ha, en hora punta pillar-lo te puet costar arredol d'una hora d'aspera, con filas que s'esparramican mesmo por a carrera difueras d'as garas.

Y, como buena ciudat que se precie en o mundo, tamién tenemos a polemica Uber-Taxi. Antis d'arrivar-ie, y malas arrivar-ie, tot o mundo me recomendó que m'instalase Uber, y tamién una app parellana y prou popular en Asia, Grab. Y a verdat ye que funcionaban muito bien, con unos pres una mica más baixos que no los taxis, pero más que más, con a tranquilidat de poder saber quánto has de pagar antis de pillar o propio auto y con a posibilidat de fer una valoración a o conductor en l'inte -y de que ell te la faiga a tu-, bella cosa que ta yo amillora muito a calidat d'o servicio y evita os abusos. Manimenos, dimpués d'a presión d'os taxistas y de que istas companyías concedesen más licencias que no as que teneban estipuladas, o gubierno fipino las apinyoró con un mes de sanción sin poder eixercer, o que estió un caos en a ciudat. Dimpués, han tornau, pero con pres más caros y con menos licencias, o que agora mesmo fa más atractivo pillar taxis. 

Pero para cuenta! Os taxis miran d'escular-te, y más que más si yes turista. Si en he pillaus bells seis, cinco vegadas he habiu de pleitiar, bien porque te quieren cobrar o que quieren sin meter o taximetro, bien porque te quieren cobrar una tarifa base más cara -en Manila ye de bells 65 centimos d'euro, y por un regular te quieren cobrar arredol de 1.50 € si no yes espiguardau. O que quitan de treslau ye más por a tarifa base que por a tarifa de tiempo u distancia, que ye muito barata -una hora en un taxi ye menos de 6 euros-, asinas que malas que apanyas a tarifa base, no t'en has de fer, pos o propio taxista ye o principal intresau en que i arrives antis con antis.

Cal decir, y más que más con os taxis y os tricycles, que si bien miran de cobrar-te una mica más si no paras cuenta, y especialment a os foranos, os abusos tampoco no son esparpallants, y por un regular istos son d'un euro por alto d'o pre estableixiu, bella cosa que no ye guaire quan totz ells son muito baratos, y más parando cuenta d'a precariedat y pobreza d'os treballadors d'os transportes en particular y de muita chent en filipinas en cheneral.

Y os viaches luengos? He charrau de cómo fer viaches curtos y medios, pero no d'os luengos. Pos bien, si quiers bochar-te por a isla de Luzón, a traza común de viachar ye o
bus. Bi ha una ripa de companyías de buses, y por un regular istas se concentran en tres redoladas d'a ciudat -Cubao, Pasay-Buendía, Sampaloc. Os buses son como los que puetz trobar por Europa, si bien de cabo quan meten l'aire acondicionau muito fuerte -mesmo t'obliga a pillar-te un chambergo!- u peliculas y cantas filipinas a tot meter. Os pres son muito baratos: por un regular, a un euro por hora de trachecto. Aquí no bi ha buses urbanos, fueras d'as lanzaderas que te levan ent'os aeropuertos. Tamién bi heba un tren que recorreba buena cosa d'a isla de Luzón de norte a sur, pero a falta de mantenimiento ha feito que buena cosa d'os tramos s'esboldreguen, y hue no ye operativo que en os troces arredol de Manila, fendo de tren de redolada. 

Ta rematar, ta viaches luengos entre islas u a la partis norte y sur de Luzón o común ye pillar l'avión. As principals companyías son AirAsia y Cebu Pacific Air -ista zaguera, a ryanair filipina. Tamién ufren viaches por os países cercanos y os pres son baratetz, alto u baixo como as lowcost d'Europa. Entre islas cercanas, son comuns os barcos y os ferrys. 

Pd: Tot isto s'aplica a toda Manila -y en cheneral Filipinas- fueras d'os vicos de Makati y BGC, os más occidentals y ricos d'o país, anque funcionan de trazas muito parellanas a como se funciona en as ciudatz occidentals.

9.10.17

En Zaragoza por Pilares!!! (Filipinas)


Qué fer iste cabo de semana? Pos en un ataque de nostalchia agora que prencipian os Pilars, m'ha dau por marchar ta Zaragoza. Pero no t'a Zaragoza de l'Ebro, sino t'a Zaragoza de Filipinas :)

 
A Zaragoza de Filipinas ye un lugar de bellas 50.000 personas que se troba en metat d'a
isla de Luzón, entre as localidatz de Tarlac y Cabanatuán, a o norte de Manila. Ta marchar-ie, cal pillar un bus dende Manila ta qualsiquiera d'istas dos localidatz, y dimpués ye de fácil pillar un jeepney t'a Zaragoza filipina. Yo pillé o bus ta Tarlac, pero dimpués paré cuenta que fuese estau millor pillar-lo ta Cabanatuán, porque o propio bus aturaba en Zaragoza y no cabela pillar jeepney. Pero ixo rai, fa goi igualment de puyar-se-ne en un jeepney que leva o cartel de 'Zaragoza'. 
 
Una vegada en Zaragoza, ascape uno para cuenta que ye un lugar que vive por y t'o roz. Una ripa de rozals por totz os costaus, campos engaronaus t'o cultivo, chent ixucando-lo en os costaus d'as carreteras, sacos arroclaus por tot arreu y buas asiaticos chigants carriando-los d'un costau ta l'atro. A la fin de l'horizont, ya se pueden veyer as montanyas d'o norte, atro d'os puestos favoritos d'os manilenyos por o suyo clima 'fresco' -d'entre 15 y 25 graus. 
   
  
Mientras, por as carreteras, os camins, o lugar y os suyos vicos, predominan as casas a
metat fer, guariches anque viven personas y bestiar, alternando-se de cabo quan con casas senyorials que serían o suenio de muitas personas occidentals. Y prou que se pueden veyer y ascuitar muita chent cantando en os suyos karaokes: l'afición por excelencia en Filipinas! 
Se troban por o camín muitas ilesias, belunas muito grans y nuevas, un fosal a piet de carretera, y de cabo quan, bella escuela y bell instituto. Prou que totz te se miran con curiosidat y extranyeza y os ninos te saludan! En iste sentiu, Zaragoza no s'esferencia guaire d'a resta de lugars filipinos. 
  
Y como no podeba estar menos, en una buena Zaragoza que se precie tamién ha d'haber
garrulos se celebran as fiestas d'o Pilar! Asinas, en o concello ya yera presta a pancarta y os escenarios ta bellas actuacions, encara que no bi heba guaire borina porque as fiestas se celebran más que más o día 12 y o cabo de semana venient. Mala suerte, si bien en a escuela ya yeran fendo actos os ninos chicotz, y podié veyer-los una mica. Ni que decir tiene que adoro as cantas de celebración, os cartels, o suyo estilismo y toda la resta de cosas que yeran aprestando, como buen hortera que en soi. 

Y ta rematar, ta que tos podatz fer una ideya millor de cómo ye a Zaragoza filipina, i fico bellas fotos. 

  
PD: T'os amigos teruelanos, tos intresará saber que amán de Zaragoza ye Aliaga, un lugar filipino con alto u baixo 50.000 habitants y que tamién vive d'o roz :)
 

 
 
 
 
 

25.9.17

A cursa tipica dende Manila: o volcán Taal

 
Iste cabo semana yera presto ta marchar t'a placha de Puerto Galera, ta fer una mica de placha y buceo, pero unas cagaleras esparpallants m'han feito reblar a metat camín. Asinas que qué millor semana ta comentar a primera cursa fueras de Manila que facié ya fa un mes, si no m'entivoco, o 26 d'agosto. 

Ta par d'alavez, mirando-me por o rete qué cursas de diya fer dende Manila, a más dita
yera la d'o volcán Taal, y no se feba guaire embolicau de plegar-ie, asinas que por ixa me decidié. Por primera vegada, pillé o bus en a terminal de Buendía -o que agora ye una tradición quasi totz os cabos de semana- ent'o lugar de Tagaytay, amán d'o lago que leva o mesmo nombre que o volcán. 

O desplazamiento en bus por istas tierras ye prou barato -entre 2 y 5 euros seguntes o trachecto, y en iste caso yeran arredol de 3- y a calidat d'os buses ye buena. Se'n va prou comodo mientras por a finestra veyes os lugars, feners y selvas de Luzón. 

Malas plegar ta Tagaytay, en baixar-te d'o bus una ripa de taxistas y conductors de sidecars (tricycles) literalment t'acosan ta que los trigues a ells en l'aproximación t'os puertos d'a localidat de Talisay, d'anque salen os barcos ent'o Taal. Manimenos, yo prefirié en primeras pillar un jeepney -más barato- que me dixó en a dentrada d'a carretera de Talisay, y d'astí me pillé o sidecar d'aproximación. Agora estoi que no lo fería, masiada molestia por cabidar-te bell par d'euros. 
  
Una vegada en o puerto, puetz logar un barco mientras toda la chornada. En o barco i cullen bellas hueito personas, y se'n bosa igual vaigas uno que hueito. Por fortuna, me trobé astí con bell alemán que me i acullió y viachando con ells compartié os gastos -que d'atra man, tampoco no yeran guaires. 

Pero a tot isto, a qué fin pillar un barco ta plegar t'o volcán?
Ye acaso en o mar? Pos no. O volcán Taal fa una isla selvatica en metat d'un lago, y curiosament, o cráter fa unatro lago. Ista estructura tierra-augua-tierra-augua lo fa especial. Ixo, y que como se puede veyer en bella foto, ye un volcán activo! Asinas, fumeras, bardos ruxients y bullients y zufre son de fácil trobar por tot o camín. A zaguera vegada que i bullió magma estió en o 2011 y a zaguera erupción violenta en o 1977.

Quan plegas en a isola-volcán, te trobas con un lugarón anque ninos y adultos te saludan con sonrisas mientras chugan a baloncesto u fan karaoke. Allí, t'ufren puyar t'a tuca d'o volcán -bells 310 metros de deslibel- en bell caballo arguellau, os pobrichons baldaus dimpués de tanto trote. Personalment me pienso que, por o bienestar de l'animal y por o polida d'a puyada en sí, ye de dar puyar-la a piet

Mientras i puyas, cada vegada veyes más y más turistas
-encara que sin plegar a una grant masificación-, quasi totz ells koreanos y chinencos, encara que tamién bi heba bell europeo. Y uno se'n demanda d'an son salius, porque abaixo en o lugar y en o puertet no bi'n heba dengún! O caso ye que as selvas s'intercambian con as fumarolas volcanicas dica plegar a o crater-lago, con bell mirador que te permite alufrar o cráter, toda la isola-vocán, o lago y buena cosa d'o sur d'a isla de Luzón. Sin dubda, anvistas y paisaches esparpallants.

Alto t'ufren chitar una pilota de golf en o crácter (!!!) u fer-te una San Miguel -a biera más común en Filipinas. A conciencia

ambiental me viedó de fer o primero, pero no lo segundo. Asinas que estió buen momento ta fer-me a San Miguel, acompanyau por cierto por os alemans, y dimpués china-chana baixemos t'o barco y ta fer o camín de tornada sidecar-jeepney-bus

Encara que ye una d'as cursas de diya más comuns dende Manila -si no la que más-, dimpués de fer-la uno comprende ascape por qué. Y ye que fa honra, ye muito polida y te permite eslampar d'a ruidera y a contaminación d'a capital.
 

18.9.17

D'o Taytay ent'o Sisig y a chent filipina

Qué fer o cabo de semana? Pos como yera estau as zagueras semanas en placha y güergas, ista vegada m'animaba a marchar ta Banaue, anque se troban os famosos rozals milenarios patrimonio d'a humanidat seguntes a UNESCO y anque se pueden fer buenas rutas por monts, conoixidas en toda Asia.

Con tot y con ixo, entre que s'amenista minimo dos u tres días ta fer-lo bien -marchar-ie son nueu horas dende Manila, dimpués cal fer una nueit en os rozals, y dimpués ye recomendable fer-ne unatra en Sagada, lugar famoso por os suyos atabuls colgants-, que en ista puenda de plevias l'orache se chira ascape y que o sabado marché a bailar salsa tallando-me o cabo de semana, decidié trigar unatra cursa más curta: placha de Puerto Galera, camping en Pangil u cursa de diya ta unas güergas y badinas en Laguna.

A la fin, pensé que lo millor yera a zaguera opción, encara que en primeras no m'aganaba de repetir o mesmo plan que a semana pasada. Pillé atra vegada o bus ta Santa Cruz, en Laguna, y una vegada allí, a famosa combinación jeepney -ista vegada ta Majayjay- y tricycle -t'as güergas de Taytay, en o parque natural d'o mont Banahao. En total, bellas tres horetas.

O puesto selvatico ye precioso, encara que una mica masificau y parau t'o turismo. Asinas, si l'acceso ent'as güergas de Pagsanjan yera más 'atreviu', iste yera poco menos que un monasterio de Piedra anque poder ficar-se en l'augua, con os camins bien marcaus y prestos, con un libel de masificación que no plega a Biarche, pero quasi. Pero istos problemas se compensaban en buena mida quan uno paraba cuenta que yera un puesto propio de filipinos: de 100-150 personas que me i trobé, nomás unatro -antimás de yo- no yera filipino. Asinas que a experiencia en sí fació honra. Cal decir tamién que l'augua yera más freda d'o normal ta estar Filipinas, anque por un regular as badinas y as güergas son caldosas. 

Como curiosidatz, a pesar d'estar un parque natural, se podeba acampar en as margins y tamién fer fuegos. Bi'n heba asabelo de chent parando-se a suya brenda y os suyos mondongos. Bien se vale que en estar tan humedo aquí no bi ha grants problemas de fuegos. Tampoco no yera guaire puerco lo puesto, más parando cuenta d'a gran cantidat de chent que bi'n heba. 

Dimpués de estar-me buen rato ficau en l'augua me facié bells pinchos de pollo y bellas sachichas a la barbacoa en un puestet local que te los vendeban por cuatro perras, y pensando en a tornada, paré cuenta que bi heba un jeepney directo t'a gara de buses de Santa Cruz, anque pillar o bus ta Manila. Ixo abarataba una mica os costes, pos os tricycles son más caros (dos euros más). Decidié pillar-lo y dentro yera rodiau d'una colla d'actividatz de chent bien agradable y sobrebuena, a las que les choqué -en no estar filipino- y me dieron buena y amigable conversación. China chana mientras o trachecto nos faciemos buenas risas, nos faciemos bella foto chuntos y a la fin me convidoron a que marchase con ells a cenar ta un restaurant a metat camín Laguna-Manila. M'explicoron que s'achuntaban os cabos de semana ta fer cursas, que yeran totz d'a redolada de Laguna  y que odiaban Manila. M'amostroron tamién bellas parolas en tagalo d'as que fan prou honra :) 


Asinas, marché con ells de Santa Cruz enta Cabuyao, concretament enta o restaurant Ton-Tons Sisig, famoso entre os filipinos por o suyo Sisig, plato tradicional que ye una mena de uegos revueltos con carne de rostro de tocín. Como dicen en tagalo, delisioso -y por menos d'un euro se'n sale un bien cenau. Y ye que, sin estar una cosa guaire elaborada, dimpués d'o diya moviu y en una companyía tan buena, o Sisig sabe a gloria. Me fa duelo de no haber feito foto d'o plato, pero en ixos momentos a fambre podeba y no dixaba alcordar-se de fotos.

De Cabuyao, ya de nueitz, pillé o bus enta casa mía en Manila. Estió un trachecto no guaire luengo. Y ixo sí, con os facebooks y os mobils intercambiaus, y convidando-me ista chent tan maha a la suya venient trobada o día 1 de octubre. Asinas que ya tiengo plan ta ixe día!



Lo que en primeras yera una cursa curta y d'emerchencia ta no quedar-se en Manila o cabo de semana, en no haber parau y pensau bien atras posibilidatz, remató estando una experiencia que no ixublidaré!

11.9.17

Navatas de bambú: Pagsanjan-Cavinti


Plega o cabo de semana, y no hopar de Manila ta veyer una mica d'a naturaleza d'as Filipinas ye un pecau. Asinas que dimpués d'estar estau en Olongapo, Anilao y o Taal -puestos a los que ya adedicaré posts-, m'he decidiu por marchar ta uno d'os puestos favoritos d'os manilenses, Laguna.

En concreto, Laguna ye una gran laguna -qué cosas!- en metat d'a isla de Luzón, y arredol d'ella, más que más en a suya parti oriental, bi ha buena cosa de ríos, badinas, güergas, ixervigaders y blincos d'augua. Dentre istos, os de Pagsanjan-Cavinti tienen muita fama en Manila y tot o país, asinas que decidié de prencipiar por ells.

Ta plegar-ie, o primer de tot ye gastar tres horas dende casa mía en Manila dica o puesto en sí, seguindo a popular combinación: autobús-jeepny-tricycle -adedicaré a un post a os transportes en Filipinas, una d'as suyas cosas más peculiars.

Malas que aconsigues plegar-ie, un guida local te leva por una selva bien pincha y bien marcada dica a cascada principal, a d'o diaple -The Evil-, dita asinas porque "se puet ascuitar a suya voz si la esnavesas''. Encara que en bellas webs se diz que se i tarda arredol d'a hora, en nomás 30 minutos ya s'ha feito o recorriu.

Pero en iste trachecto, o millor ye que cal fer bell par de rapel-volaus con unas midas de seguridat radidas... Lastima no haber puesto fer fotos ni videos d'o momento, pero bell par de caitas libres de 20-30 metros asegurau nomás por una cuerda que no fa buenas farchas y por a man d'una persona alto que no pareix guaire intresada en a tuya vida sino en fer-lo tot antis con antis -y a la que cal decir-le que por favor tranque os mosquetons de rosca!- fa cerina. Pero bueno, si antis que no tú lo han feito ixe mesmo día atras 50 personas y no ha pasau cosa... pos feremos la d'aquell y a tirar. 
 
O caso ye que en ensavesar a pincha selva y fer ixos rapels, aconsigues plegar a la parti más important: a güerga y a cascada d'o diaple. Pinchismo puesto, con ixervigaders granizos con vechetación tropical, que personalment me fació alcordanza de bellas clamors de Tenerife que se troban en Masca y Anaga. Encara que o puesto ye parque natural, en una badina en concreto uno puet ficar-se en l'augua, y tamién puet pillar unas navatas -y sí, no tiengo mica dandalo de que a millor parola ta clamar-las ye navatas, como se veye en a foto- de bambú, que esnavesan a famosa cascada fendo-te creyer que yes en una lavadera y te levan enta l'interior d'a espelunga, con unas anvistas sobrebuenas de toda la val, dibuixando un arco San Chuan. D'atra man, pese a estar un puesto turistico un domingo, bi heba una cantidat "aceptable" de chent, arredol d'as 100 personas mientras tot o diya, nunca no superando-ne as 50 en garra momento en garra puesto, y podendo estar-se-ie mesmo bell rato solenco. Cosa a veyer con o blinco de Biarche, y ixo s'agradeixe.

Dimpués d'esnavesar a cascada, estar-se un rato en a espelunga, ficar-se en l'augua, y en cheneral, de pasar tot o tiempo que se quiera en ixa maravilla de puesto, pertoca unatra sorpresa. A tornada en una cosa que le dicen rafting -que en reyalidat ye un mezclallo entre un rafting facilet y una gambada en canoa- dica a parti de salida. Independientment de que siga u no propiament un rafting, os paisaches merixen a pena. Vas de contino encaixalau en una foz tropical, veyendo blincos d'augua, entre granizos paretz, ascuitando os muixonetz y veyendo a fauna acuatica, acompanyau de bell par de guidas simpaticos que te comentan as caracteristicas d'o puesto.

En plegar a la fin, encara pertoca una chicota gambada de bells 15 minutos, a traviés de bells palmerals que no desmereixen, dica plegar en a carretera en a que pertoca atra vegada prencipiar a travesía de tornada: tricycle-jeepny-bus, y ista vegada asperando buena cosa de trafico en Manila. Pensé alavez que, habendo tantas maravillas por ixa redolada y librando hue, habría d'haber-me quedau ixa nueit por astí, pero no iba presto. Con tot y con ixo, no dixa d'estar una magnifica sincusa ta tornar-ie!

4.9.17

Tornamos un atra vegada: enta Filipinas


Encara que iste blog lo prencipié en 2006, ha teniu puendas grans d'inactividat por motivos varios, tantas como vegadas que he tornau temporalment con ell.

Agora quiero prencipiar una nueva puenda, aproveitando-lo como mena de diario anque ir refleixando china chana as experiencias d'un nuevo blinco en a mía vida: vivir en Filipinas.

I arrivé o 3 d'agosto, y con tasament un mes por istas islas -y más que más por Manila- as experiencias son estadas muitas y variadas. Soi estau más intresau en vivir-las que en racontar-las, y antiparti quereba reposar una mica tot o viviu antis de meter-me a escribir.

Si garra parola he d'emplegar ta describir isto, ixa ye cambio. Quereba un cambio, y bai si lo he teniu. Más grant que no m'entrefilaba, pero de buen implaz y bien contento. A primer semana encara me demandaba a yo mesmo si no la heba liada masiau, y puet-estar que sí, pero dimpués d'un mes, quiero más y más. En iste primer post agora dixaré nomás bellas claus, as cosas que más impactan nomás en plegar-ie:

Trafico

Lo leyes de contino, te lo diz chent, y piensas "tampoco no será ta tanto". Pos sí, sí que en ye. Fumo, tiempo perdiu, frenazos, tos, mocos negros... pero no ye ixo o pior. A carrera no existe, o a lo menos no como espacio de convivencia, y quasi no de circulación de personas. Ceras estreitas -y ixo quan bi'n ha- y una lei: si puede ir una persona por astí, más encara una moto u un auto. Fer dos kilometros a piet ye como fer-ne diez en Zaragoza: a ciudat no se disfruta andando, se vive indo y tornando en esferents medios de transporte ta esferents puestos. Trobo a faltar poder fer una gambada tranquilo por o marguin de l'Ebro con Blacky. En Manila os centros comercials son "espacios de tranquilidat"...

Dos velocidatz

D'a extrema pobreza -urbana, esferent d'a rural, que isto dará t'atro post- enta una riqueza que no se troba en Zaragoza. Dos mundos en un mesmo espacio fisico, pero que quasi no se tocan, pareix que se odian. Trobarás personal de seguridat en as fronteras y mugas d'os puestos d'o mundo rico, pero a seguridat aquí no ye un problema, como diré dimpués. Entrefilo que son astí por atros motivos. Quan uno vive en o mundo rico, no puede evitar marchar t'o leito bell día remugando y con ensonyaderas.

Amabilidat, nobleza y seguridat

M'han tratau bien, muito bien. Siempre con una sonrisa en o rostro y sin mirar d'enganyar -nomás una mica en os puestos más turisticos, pero poco t'o que podrían fer. Nobles. Y he puesto mover-me a todas as horas d'o día por totz os puestos, dende os más pobres dica os más ricos. No voi a negar que mover-se de maitinadas por os ambients más pobres imposa, y más quan totz te se quedan mirando fito-fito en parar cuenta que yes forano. Pero rai, luent de tener garra problema, te reciben con sonrisas y te saludan. Y contra más pobres, más acullients. Seriosos tamién en treballar, encara que masiau burocratas: siempre bi ha papels, papels y más papels... nunca no se quedan aturaus, siempre s'enanta china chana en totz os pasos, pero pareix que nunca no se remata de fer papels.

¡Un poquico pan!

Pos no, aquí roz, y prou. O mío casero, como cenyo de buena voluntat, decidió regalar-me una rocera -un traste, con un mecanismo parellano a una cafetera tradicional pero más grant, que fa o roz ascape y fácil. 
Yo le dicié que no caleba, que no minchaba tanto roz. Y ell respondió: ¡pero cómo que no minchas roz, ixo ye imposible! Y me la regaló. Poco dimpués me demandó si quereba una tostadora, pero me dició: suposo que no, ¿qui mincha pan?

Por agora prou, que iré decindo-ne cosas. Repasando, veigo que ha quedau tot o negativo primero, y quasi me fa duelo. Como he dito en prencipiar, soi bien contento y feliz, y pocas cosas más negativas se pueden decir d'iste país -lo menos por agora. Debant de tot, aquí bi ha hospitalidat, alegría, felicidat, honestidat, y futuro.

Asinas que dende agora me centraré en as cosas positivas!

6.7.17

Argumentacions fablils: u totz monches u totz canonches

Fablilandia ye en guerra. Garra novedat. O zaguer motivo ye o comunicau conchunto de EFA y SLA refusando as directrices graficas publicadas en o BOA, a instancia d'a Dirección Cheneral de Politica Lingüistica (DChPL). Dos principals argumentos i aparixen, que sintetizaré asinas (sin animos d'esparricar-me ta no fer d'isto un tochaz):

Postura A: Se ye perdendo una gran oportunidat ta solucionar o conflicto grafico de l'aragonés, y por ende, d'aduyar a ista luenga en a suya supervivencia.

Postura B: O proceso ta fer y publicar istas directrices graficas ye estau fosco. As directrices son fuleras y s'han aprebau por dezaga.

Alavez, ye quan yo pienso que conviene recordar atros feitos (bi'n ha ya, por desgracia, buen faixo) tristes ta l'aragonés. Uno d'ells estió quan o TSJA suspendió a inclusión de l'aragonés en o curriclo d'ensenyanza, en l'anyo 2014, tras una denuncia d'a Fundación Gaspar Torrente (menada por buena cosa d'a chent que agora fa parti d'a DChPL) debiu a que iste curriclo colaba a amagatons a propuesta grafica d'a EFA. Dos principals argumentos tornan a aparixer-ie:

Postura A: S'ha perdiu una oportunidat historica (en o suyo momento) ta tener un curriclo d'aragonés en primaria y desenrollar as clases d'aragonés en primaria, aturando l'amostranza en horario lectivo en ixe curso en Broto y Aínsa.

Postura B: S'ha mirau de colar por dezaga y d'una traza fosca una propuesta grafica no consensuada, a d'a EFA.

Y, como he dito antis, atros eixemplos argumentals pueden aportar-se-ne (II Congreso de l'Aragonés, a formación de l'Academia a la fin d'o mandato de Marcelino Iglesias, etc.). 

¿Y quála ye a mía postura debant de tot isto? Pos basicament, me bufa prou a pocha. Considerando que a grafía debant de tot ye una convención, personalment con un piet en Filipinas y sin garra aspiración de garra mena en l'aragonés fueras d'amostrar-le-ne a o mío fillo, tot isto me pilla prou luent, pero qué menos que estar coderents y no hooligans si nunca se quiere plegar en bell acuerdo. ¿Y qué ye estar coderent y qué ye estar hooligan? Pos ta yo:

Hooligan: esfender una combinación de posturas A-B (u A¬A, B¬B). Por eixemplo, criticar que as recients directrices graficas s'han aprebau d'una traza fosca y fulera, pero dimpués negar a mayor con a inclusión d'una grafía en o curriclo d'aragonés de primaria. U por eixemplo, decir que s'ha perdiu una ''oportunidat historica'' en refusar istas directrices graficas recients, pero no aceptar a oportunidat que se perdió en o suyo momento en aturar as clases d'aragonés en Broto y Aínsa (Por cierto, que o mesianismo de "oportunidat historica" daría tamién t'atro post)

Coderent: combinacions A-A y B-B. Por eixemplo, reconoixer que bi heba una oportunidat ta solucionar o problema grafico que s'ha perdiu (aquí saldrán esferents culpables, de seguras) y reconoixer tamién que en o suyo día a suspensión d'o curriclo estió perder unatra oportunidat. U bien, criticar istas zagueras directrices graficas en estar aprebadas d'una traza fosca, pero tamién reconoixer que colar por dezaga una propuesta grafica en o curriclo d'amostranza estió una error.

Por desgracia, abundan os hooligans y no pas os coderents por totz os costaus, y más que más en un mundo tan viciau como fablilandia. Yo, por a mía parti, y dimpués de que belún m'adscribise bella postura por astí, no digo so que a mía postura se resume bien en un dito aragonés: u totz monches u totz canonches.