19.2.18

Ent'os arredols de Legazpi: o timo de Donsol y o paradís de Jovellar



Dimpués de bell par de diyas por Legazpi y arredols, mirando-me quantas vegadas o volcán Mayon, marché t'a gara de Legazpi y allí pillé una furgoneta que me levó dreito enta Donsol. Iste lugar, encara en a rechión de Bicol, fa parti d'unatra provincia esferent a la de Albay: Sorsogon. Y ye que Donsol ye famoso en estar -dicen- uno d'os millors puestos d'o mundo ta fer buceo con tiburons ballena.

En arrivar-ie, pillé un hotelet en a costa a prou buen pre y muito mahos totz astí (por fer-
les una mica de publicidat, l'hotel se deciba 'Amor'). Poco antis heban mirau d'escular-me en unatro. Cené por astí y facié una gambada por o lugar, tranquilet, prou filipino y sin guaire historias, tot y que ye un puesto prou turistico. A l'atrol diya, puyé bien luego, a ixo d'a meya t'as siet, ta marchar t'a oficina municipal que chestiona as cursas d'as ballenas -no permiten interpresas privadas-, y me bi inscribié, pertocando-me estar-ie chunto con tres americanos bien mahos. Dimpués de veyer un video de seguridat y regles -y prou propagandistico- os quatre puyemos en un barco y ent'as ballenas que nos lancemos.

Dentre os tres lugars que ufren istas cursas de buceo u snorkel con ballenas en Filipinas, Donsol ye famoso en estar -dicen- o que menos estrés y impacto ambiental chenera en o
ecosistema y en os bichos. Asinas, aquí preservan os bancos de placton, a biroya d'as ballenas, y no las alimentan a esprés, como fan en atras partis, que las tienen quasi domesticadas. Antiparti, o concello colabora con WWF y os guidas son reconoixius por ista organización. Pos bien... tot mentira. A estratechia ta poder bucear con as ballenas ye encorrer-las con o barco -fendo bien de rudio- dica enantar-las y astí, bien rapedo, os turistas han de blincar enta l'augua y estar-se chunto a o bicho mientras bells segundos dica que iste preta a baixar por a cerina que le fa estar estorbau por bells humanos que blincan en o suyo augua de rapiconté. No sé guaire de ballenas... pero churaría que les fería más goyo que las alimentasen y domesticasen, antis que no encorrer-las y fer-les ixe espanto. Y o turista tamién tendría una experiencia más atractiva -encara que isto siga o menos important. En resumen, isto d'as ballenas en Donsol ye fulero de tot.

Dimpués d'iste desenganyo, no querié fer garra cosa más por astí y torné ta Legazpi, an
que me miré o volcán y visité os zaguers parques y plazas d'a ciudat que encara no heba vistos. Pillé hotelet y a dormir, t'a l'atrol diya fer a millor cursa d'iste viachet: Jovellar. Jovellar ye un lugar en a muga entre Sorsogon y Albay, en metat d'os monts y prou verde, que ye famoso por os suyos pueyos, chunglas, cocoters, y por as suyas espelungas y o suyo río subterráneo. I arrivé dimpués d'a famosa combinación jeepney-tricycle, y astí, bosé as correspondients tasas ambientals y una guida muito maha me levó por a espelunga inicial y dimpués por o río. En iste lugar, os guidas son alumnos voluntarios de l'instituto, que con as propinas quitaban bell cauquerré. Primero, dimpués d'una gambada por a selva d'a redolada, visitemos a espelunga, bien gran y maha, encara que tampoco no yera esparpallant como a de Sagada; feba duelo veyer estalagtitas a boticiegas crebadas por turistas desucaus.


Y dimpués d'a espelunga, tras atro buen troz a piet de selva, cocoters y bella vaca, o
plato fuerte: o río subterráneo. En a suya dentrada, un puent de bambú y una repolida cascada t'asperan, en una foz selvatica an que os ninos blicaban clamors de 20 pietz: o paradís! Pero si isto ye o paradís, a cursa por o río encara ye millor. Nomás 300 metros -muito más chicota que a d'o río subterráneo de Puerto Princesa en Palawan- pero muito más polida: nomás una navata de bambú ta entrar-ie y salir-ne t'aseguraban una experiencia más intima, chunto con o feito de que a espelunga yera más estreita. Alto, chamineras d'augua -estalagtitas truncadas d'as que surtiba l'augua- y a la fin, una cascada con poza dentro d'a espelunga! A tot isto, se l'ha d'adhibir a esparpallant fauna d'a espelunga: moriciegos, y más que más as suyas crías chicorrichonas! Sin dubda, isto estió o millor que veyé en a redolada, y una d'as cosas más polidas de Filipinas. Y sin estar tan conoixiu y turistico! De feito, seguntes me dició a guida, l'ubrioron en 2015 -antis yera ubierto, pero en condicions muito más especials y envolicadas. Quan me lo dició me pensé que yera curioso que o túnel chaponés que i visité l'ubrioron en 2012, y isto fa una ideya d'o recient desenrollo turistico d'a redolada.


Feito o río, encara caleba marchar ta unas gorgas y unas badinetas bien pinchas an que rematar de capuzar-se y chipiar-se. Me quedaría astí toda la vida! Encara que a mesacha guida me deciba que ixe lugar yera muito aburriu... Talment en una semana querría eslampar d'astí como siga.

Dimpués d'ixo, previa visita a la plaza-parque d'o lugar que como curiosidat teneba un monet con estrinquets 'cortesía' de l'alcalde, ya torné ta Legazpi y astí, dimpués de chentar y fer-me sucos de canya de zucre con calamansi, pillé o bus d'atras 13 horas ta tornar ta Manila en domingo de maitinadas. Prou como ta descansar-me y prencipiar atra vegada as clases o lunes! 

12.2.18

Ent'o volcán Mayon y Legazpi: lava y cosetas curiosas



Convivencia catolica en o mío treballo ista primera semana de febrero, a la que no heba d'ir, asinas que o cabo de semana s'achuntó con o miercres, chueus y viernes festivos, y prou que no perdié a oportunidat de fer una visita a l'acontecimiento natural d'o 2018 en Filipinas, de raso
present en os medios de comunicación totz os diyas: a erupción d'o volcán Mayon, a o canto d'a ciudat de Legazpi.
 

Legazpi ye una ciudat d'arredol de 200.000 habitants en o extremo sur d'a isola de Luzón, en a provincia d'Albay y rechión de Bicol, que debe o suyo nombre a Miguel López de Legazpi, conqueridor espanyol de Filipinas y fundador de Cebú y Manila. Se troba a bells 330 kilometros de Manila, arrivar-ie en avión cuesta poco más d'una hora, y en bus bellas 12-13 horas. Como me trobaba con fuerza, l'avión ye más caro, quereba veyer paisaches y seguntes bufe l'airera a cenisa volcanica priva os vuelos, a la fin prenié o bus en Pasay -a man de casa mía- y astí que me planté o maitín d'o miercres.


Ya a bells 50 kilometros de plegar-ie, se podeba veyer a Mayón, con as zorreras que feba
en a suya tuca y en bella partichona baixo en a suya defesa. Ya de por sí iste volcán ye repoliu, y beluns dicen que ye o más 'perfecto' d'o mundo, pos cerca d'a costa s'en puya en metat d'una gran plana dica quasi pillar os 2500 metros d'altaria con una forma conica quasi perfecta. Manimenos, malas plegar-ie una boira -u millor dito dos, una d'augua y unatra de cenisa- zaboyó a más gran parti d'o volcán, y asinas quasi de contino mientras dos diyas. Peneta...

Pero bueno, facié a d'aquell y dimpués de trobar un hotelet decent y a pre razonable, y de descansar-me un ratet tras o viache, pillé a famosa combinación jeepney-trycicle y marché t'a mía primera cursa: os tunels chaponeses de Camalig. En metat d'un mont d'a redolada con bien de chungla, os chaponeses facioron tunels mientras a segunda guerra mundial ta protecher-se d'as enrestidas norteamericanas. O guida, bien maho por cierto, me comentó que bi'n heba trobaus 21, pero nomás uno yera accesible porque yera l'onico en o que o propietario d'os terrens heba dau permiso. Ye curioso que o túnel que visitemos lo descubrioron en 2012 partindo de testimonios de viellos locals, y que l'armada filipina i trobó armas a brozuecos: dimpués, l'adaptoron t'o turismo. O que más me fació ficancia fue que os tunels s'iban achiquindo china chana, y ye que os chaponeses asinas pillaban avantalla en estar más chicotz que no os norteamericanos. Una vegada visitau o túnel y en saliu pleno de bardo, o guida m'amostró dende l'alto d'un pueyo os principals puestos d'a redolada de Legazpi. 
 
Dimpués d'istos tunels, marché t'as famosas ruinas de Cagsawa, antiga ilesia espanyola feita en 1724 y que quedó apedecada dimpués d'a erupción d'o Mayon en 1814. A suya torre y a resta de runias son feitas en piedra volcanica negra, por o que remeran a las construccions tipicas colonials canarias. L'anvista d'a redolada natural ye polida, encara que as boiras no permitiban veyer a Mayón. Tamién, como en totz os puestos turisticos de Filipinas, se i trobaba bellas botiguetas, an que destaco una de sucos, do me facié o millor suco de guanabana de Filipinas -y probablement d'a mía vida. Y visitada Cagsawa, torné ta Legazpi, an que me facié bella gambada y marché a dormir ascape, pos yera baldau.

A l'atrol diya, ya con más fuerzas, decidié fer una d'as cosas que nunca no repetiré en a mía vida: colar-me en a zona d'evacuación d'un volcán en erupción. Y ye que no iba a dixar pasar a oportunidat de fer una gambada por o parque natural d'a Mayon y de mirar-me una mica más de cerca a erupción. En primeras miré de fer-lo por os senders de Mabini, pero no estió posible (masiada vichilancia) asinas que i dentré por a parti de Santo Domingo-Lidong. Cultivos y bell carabao, ta dimpués entrar-ie en o parque propiament dito, con a suya repolida selva, y andar por astí mientras bell kilometro y medio. O perimetro d'evacuación ye de cinco kilometros dende o crácter, y servidor i arrivó dica lo 3.5. Astí, ya esnavesada a selva y en un plano alto sin garra arbol fueras de bell cocoter, a man cucha a bells d'os kilometros podeban veyer-se as roscadas de lava grisa fumeyant. Alto, una boira no dixaba veyer cosa, y como no yera custión d'esnavesar-la sin saber o que me i trobaría, pos aturé por astí. De cabo quan bella ruidera parellana a la que fan os militars en San Gregorio, y en istas, una ruidera y un tremol bien furos y continos y toda ixa boira de cenisa baixando enta do yo yera y trusquido-se-me... Probablement un experto en istos temas me dirá que soi un gabacho y un falso, y que tampoco no ye ta tanto, nomás sé que pasé mal rato y que no tornaría a fer-lo. 
 
Ya abaixo y pasando o espanto, marché ta l'hotel ta cambiar-me a ropa cenisosa y fer-me una ducha, y dimpués marché t'o pueyo de Ligñon, en a propia ciudat de Legazpi, que ufre buenas anvistas de toda a ciudat, d'a redolada y prou que d'a Mayon. En puyar-ie, tamién te trobas con bells tunels chaponeses feitos mientras a segunda guerra mundial, y alto, una ripa de botiguetas. Con tot y con ixo, en as guidas tiene muita fama, y personalment estoi que no ye ta tanto. Ya que no pillaba guaire luent, me pasé tamien por a ilesia de Daraga, historica y con orichen espanyol, an que les merqué a bells ninos una empanada local feita con patacas que sabeba a gloria. Dimpués d'isto, me descansé una mica en l'hotel y ya de tardis marché -con plevia- t'o embarcadero de Legazpi y o boulevard Legazpi, paseyo maritimo, poliu pero sin estar guaire cosa, con buena cosa de restaurants y bars y con un centro comercial, encara que por a plevia y en estar entre semana no yera guaire poblau. Se notaba que yera una d'as zonas más ricas d'a ciudat, pero sin estar una Marbella ni muito menos. 
 
Y dimpués marché a dormir ta l'hotel, ta pillar fuerzas t'os atros dos diyas en os que arrecorrié esferents puestos d'as redoladas de Albay y Bicol, y que comentaré en o post d'a semana venient!


5.2.18

Enta Baler, Aurora (ii): yo quiero vivir aquí


Visitau Baler y con o cuerpo baldau por a sesión de surf d'o diya d'antis, me decidié a fer en dos diyas bell par de cursas por os puestos naturals que son arredol d'o lugar, en concreto en o sur y en l'interior. En iste lugar, os tricycles son tamién homologaus como guidas, asinas que en pillé un, y tenié a suerte de que a la fin fue muitismo maho, o suyo nombre ye Raimundo, y nos hemos dau os telefonos ta fer-nos bella biera quan i torne!

A cursa prencipió visitando as isletas marinas de Dimadimalangat y Aniao, curiosas formacions que desaparan esferents plachas: no son cosa de l'atro mundo, pero ya que pasas por astí, no ye de más aturar una mica y fer a tipica foto. Y dimpués d'istas visitetas, aturemos en o blinco d'augua de Digisit. Igualment, tampoco no ye cosa d'atro mundo, un chorro parellano a os que se troban en o monesterio de Piedra, que no fa güerga ni cosa, pero que ye a o canto d'a carretera, por o que no ye de más aturar-se, mirar-se-lo un ratet y fer a tipica foto. Y dimpués d'istas visitetas, nos enfilemos enta placha de Dikasalarin. Os terrens d'ista caleta perteneixen a un senador, y cal bosar buenos diners ta poder entrar-ie: por dentrada (300 pesos) y en haber de pillar unatro guida autorizau (150 pesos). Manimenos, una vegada visitada, puedo decir que ye de dar y fa vez bosar ixos diners. 

Dikasalarin ye una facienda de cocoters bien apanyada y polida, a os pietz d'as montanyas, con dos repolidas plachas paradisiacas, y encaixaladas entre cillos y monts grans, plens de selva y con bella espelunga. A uno d'istos monts se puet puyar a piet, en un trachecto de bells 15 minutos, dica rematar en un moderno faro. Aire puro, verdor, bisas marinas, cocoters, orache sobrebueno, augua turquesa, candreixos ermitanyos por totz os costaus, peixes de todas as colors... qué más se puet demandar? D'atra man, o suyo pre tamién favoreixe que no bi haiga guaire chent, pos millor encara. Y entre os cocoters, atras cosas curiosas: a recreyación d'un lugarichón ilongote, con os pomos d'as puertas fendo mans talladas en fusta, a casa de l'artista pincha y con bells cuadros, y dimpués, a casa de l'ambaixador, una casa de disenyo repolida, que cosa tien a envidiar a las que se'n son fendo en o Matarranya, y en metat d'una selva de cocoters y felqueras esparpallant. 

Dimpués d'isto pertocaba tornar, pero antis de plegar en Baler, le dicié a Raimundo d'aturar en o mont Ermita. Y ell bien maho, estió d'acuerdo! En concreto, m'aturó en as estatuas de Tromba Marina, que seguntes me dició Raimundo remeran o tsunami de 1735, que estricalló o lugar de Baler, sobrevivindo nomás as siete familias que puyoron enta iste mont representadas por as siete estatuas, fuyindo d'a ola. Dende astí, puyé os escalerons ent'a cruz d'o mont Ermita, an que se tienen unas buenas anvistas d'o lugar, d'as selvas, d'os monts y d'as plachas de Baler. Dentre Tromba Marina y a cruz, se troba un plano en o que han meso buena cosa de botiguetas de souvenirs. Y, feita ista visiteta, ya torné a marchar t'o mío hostal en a placha de Sabang, an que me facié bella biera y cené, visitando tamién o centro de Baler de nueitz -sin guaires historias- y quedando con Raimundo ta fer a zaguera cursa a l'atro'l diya.

A l'atro diya, bien de maitins y dimpués de desayunar-me como cal, quedé con Raimundo
con a intención de visitar dos puestos en Aurora, ya fueras de Baler: l'árbol Millenium y as cascadas de Ditumabo. O primer, ye un árbol que en a redolada dicen ye l'árbol más gran d'Asia. Ye d'o chenero balete, parentalla d'as figueras, y en realidat surche d'as brencas d'atros arbols y creixe ent'abaixo quasi como una liedrera, dica que a la fin afoga a lo suyo árbol matriz orichinal. En iste caso, ye tan gran que as brencas que creixen ent'abaixo fan espelungas y laberintos que puetz arrecorrer por dentro. Tot y que ye l'onico que se troba en a redolada y que o puesto ye masiau turistico, nomás por ixa mena d'espelunga-laberinto que puetz arrecorrer por dentro de l'árbol ye de dar fer-le a visita. 

L'atra visita, as cascadas de Ditumabo, en o lugar de San Luis, tamién ye recomendable. Dimpués de bosar un guida y a correspondient tasa ambiental -que no son guaires diners- fas o recorriu, por un vallón humedo, con vechetación tropical, cocoters y felequeras a boticiegas, esnavesando varias vegadas o río -bella vegada con vagas- y pasando a o costau de sobrebuenos blincos d'augua, dica a la fin plegar en o blinco principal, que fa una chicota poza en a que no te puetz quasi ficar en l'augua por a periglosa corrient. Surte buen chorro d'augua que quasi pareix solucionaría os problemas hidricos d'a peninsula iberica... Esparpallant.

Y ya dimpués d'isto, torné ta Baler con l'amigo Raimundo. Aproveité as zagueras horas astí ta chentar unatra vegada ixe peix que minché o primer diya y que me sabe a gloria, y dimpués d'ixo, marché ent'a gara de buses an que pillé o bus enta Manila. Ista vegada me costó una hora más plegar-ie, por o trafico d'a capital filipina. Pero bien contento que soi estau en ista cursa, por a chent amable de Baler -pura filipina-, por as suyas plachas, os suyos monts y a suya historia. Sin dubda, ye un puesto que repetiré y en o que no m'importaría de vivir perén

28.1.18

Enta Baler: o paradís de 'Los últimos de Filipinas'


China chana s'acerca o diya de tornar a treballar, pero no quereba deixar pasar istas vacanzas de nadal sin visitar un puesto que historicament prou que clama: o lugar de Baler, que a suya ilesia fue o puesto d'a famosa historia de 'Los últimos de Filipinas', a clica de sorches espanyols que entre 1898 y 1899 esfendioron a ilesia sin saber -isto ye debatiu- que espanya heba perdiu a colonia filipina a mans d'os estaus unius. Tamién m'heban dito os filipinos que Baler yera un puesto muito conoixiu entre os aficionaus a o surf

Asinas que o chueus pillé o bus nocturno dende Cubao (Manila) enta Baler, y en un trachecto que duró bellas 6-7 horas, astí que me planté. A primera sensación d'o puesto fue muito buena: buen orache, buens monts y placha, relaixación sin polución ni rudios, una mica de surf y turisteo, pero no guaire y más que más local, chent muito amable y pres que, sin estar os más baratos de filipinas, tampoco no yeran os pres occidentals que uno se troba en Boracay u El Nido. 

O primer que facié, ixe mesmo diya, estió fer una visita a os principals monumentos d'o centro historico d'o lugar. Asinas, prencipié por o museu, feito fa pocos anyos, de dos plantas, practicament una d'ellas adedicada de raso a 'Los últimos de Filipinas' con buena cosa de material donau por os museus más patrios patriotismos espanyols -buena cosa d'ell, como redomas de brandi, sin garra relación con a historia en custión. Antiparti d'isto, tamién se i troba una parti homenache a Aurora Quezón, muller d'o segundo president de filipinas, Manuel Quezón, y que da nombre a la provincia, y tamién han dixau bellas seccions d'antropolochía y d'artistas locals. O museu ye en o parque Quezón, presidiu por una estatua adedicada a iste famoso politico filipino. Dimpués d'isto, y por o mesmo pre -bells 60 centimos tot- marché ta casa Aurora Quezón, una reconstrucción d'a casa en a que se crió en o mesmo puesto an que se trobaba a orichinal: ye una visita no guaire atractiva, pero curta y que dentra en o mesmo pre d'a entrada en o museu, que se troba a man d'iste y que fa honra ta conoixer una mica l'arquitectura tradicional ilongote, a tribu guerrera que antismás poblaba ista redolada -agora son occidentalizaus. 

Y dimpué d'isto, marché a lo que yera buscando quasi quasi dende fa meses: a ilesia de San Luis de Tolosa de Baler. Muito refeita u mesmo reconstruita mientras o sieglo XX, a iglesia ye famosa por l'antis dito: o sitio de Baler y 'Los últimos de Filipinas'. L'interior sí que ye más orichinal. Arredol, o colechio, a plaza con un poliu monumento y bell edificio municipal chicot: en cheneral, tot un espacio diafano y ubierto que fa prexinar cómo estió lo sitio de Baler, no nomás arroclau en a ilesia, sino tamién en as antigas cortz d'arredol que hue fan a plaza y as replacetas d'o colechio. Y una vegada astí, podié fer realidat o mío suenio humedo dende fa semanas: fotos en a ilesia de Baler con os míos chandals de venezuela y filipinas! Me las fació un policía muito simpatico que yera cusirando o colechio y que charraba una mica de castellano, y dimpués de fer-me-las, m'animó a rezar dentro d'a ilesia :-)

Visto o centro y os monumentos, me'n fue ent'a Sabang Beach, a placha d'o lugar de Baler,
a rebutir d'hotels y puestos ta surfers, y tamién con bell guariche bien apanyau y buena mosiqueta. Sin estar Boracay, ye un buen puesto ta estar-se-ie: ni masiau tranquilo ni masiau moviu-masificau, con bell occidental surfero, pero más que más con filipinos. Y de pres, pos no ye como a resta de filipinas -u como lo mesmo centro de Baler- pero tampoco no son os pres occidentals que se troban en os puestos más turisticos d'o estau. Trobé un puestet muito digno y a buen pre ta pasar bell par de nueitz y marché t'uno d'os restaurants con terraceta y buena mosiqueta, anque prebé a chentar una cosa que no sabeba o que yera y que a la fin estió o millor peix que mai m'he minchau en a mía vida, y ixo que a yo o peix poco goyo me'n fa!

Y dimpués d'haber chentau y d'haber feito una gambada por a placha, pos pertocaba o segundo plato fuerte d'o viache: pillar a un instructor y fer una horeta de surf. A mía primera vegada! Pero con muitas ganas, ixo sí. A experiencia no la ixuplidaré mai, por o fracaso que en fue: ni una vegada aconsiguié estar-me mas de dos segundos en piet en a tabla, y a os 45 minutos deixé a clase por o baldau y acollonau que en yera. Unas olas que encara me fan ensoniaderas, con una que me se trusquió de tot y me tenió, sin desacherar, bells diez segundos baixo l'augua -dimpués d'ista aturé a clase-, estando a onica persona que yera a ixas horas -alto u baixo as quatre d'a tardi- y con ixas olas fendo surf. No me rindo, y tornaré a fer-ne, pero a venient vegada, m'aseguraré que bi haiga más chent fendo-ne y me los mirare una mica antis ta veyer si ye factible u no. L'anecdota astí queda, ixo sí! 

Y ya ta rematar o diya, con a tardada marché a piet ent'o puent colgant de Zabali: en os arredols de Baler, fa honra ta esnavesar o río y ye de dar visitar-lo, no por o puent en sí, sino por os esparpallants paisaches: a un costau, a desembocadura d'o río y a placha, a l'atro costau, os montanyas de Sierra Madre y en as dos marguins d'o río, selvas de cocoters y felquerals repolidas, con bella vaca -pocos carabaos-, bell tocín y bells gallos, quasi sin casas y sin chent. O prencipio d'a pelicula de 'Los últimos de Filipinas' retrata muito bien istas anvistas, y cal felicitar a o director de fotografía, pos lo clavó!

Y feito tot isto, dimpués d'un diya pleno pleno, torné t'a placha, cené una buena pizza con una biera en un guariche surfero veyendo l'ambient que bi'n heba -ni muito ni poco: a suya mida chusta- y marché a dormir a garrón tirau, cayendo ascape y dormindo quasi diez horas ta concarar as chornadas que m'asperarían os atros dos diyas y que racontaré en o proximo post!

21.1.18

En Boracai dimpués de reis: a Ibiza d'Asia


Dimpués de reis, y con encara diez diyas de vacanzas por metat, decidié pillar un vuelo, o más barato que me levase t'un destino atractivo: y o resultau d'a busqueda en skyscanner estioron os dos aeropuertos de Boracay. Boracay ye una isola conoixida en toda Filipinas por a suya borina y tamién -como a resta de Visayas- por as suyas plachas, tanto que se le diz a 'Ibiza d'Asia'. A yo a verdat que en primeras no me convenceba guaire, pero entre que tot o mundo charra d'ella, que bella vegada heba d'estar-ie y que tampoco no yera custión de levar a contraria a skyscanner -y a o cauquerré- pos a la fin o destino estió Boracay, i arrivando en l'aeropuerto de Caticlan, bien cerqueta d'a isola de Boracay.

O primer de tot, que choca muito, ye a grandaria d'a isla. Y ye que uno pensaría en una
isola de tamanyo medio-gran, pero no, Boracay ye bien chicota, de bells seis kilometros de luengo por dos d'amplaria, y ixo estando chenerosos. Ya en l'aterrizache tamién choca a gran cantidat de kitesurfistas que bi'n ha, asinas como de barcos. Pero no d'edificios y tampoco no de masificación. Y ya en tierra firme, en Caticlan dentro d'a isla muito más gran de Panay, l'aeropuerto ye tan chicot que un bus te leva dende l'avión ent'a terminal esnavesando primero tot o lugar, y a pocos pasos d'a terminal, ye o puerto, anque pillar os barcos que en 10 minutetz te dixan en Boracay.

Arrivau en Boracay ya de tardis, m'adediqué a buscar un hotel pincho y barato, y gracias a o gran amigo internet y a que busqué en una zona calmadeta d'a isla, no m'estió difícil de trobar-lo. Con tot y con ixo, o tratamiento que recibié en l'hotel -que no estió malo, pero no yera a calor tipica filipina y pareixeba más bien un trato 'madrilenyo'- y os pres de tot en a isola -parellanos a os espanyols: no caros, pero no baratos, y en o contexto filipino, caros- ya te fan entrefilar que, como ocurriba en El Nido, yes en una redolada occidentalizada.

Dimpués, en ixa mesma primera nueit, facié una gambada por White Beach, a placha

principal d'a isola, de bells 4 kilometros, y trestallada en tres 'stations'. A primera y a tercera -en ista zaguera se trobaba servidor- son más calmadetas; a segunda, con buena borina a tot estrús y ambient costero en cheneral: restaurants, bieras, mosica y actuacions en a placha, botiguetas y mesmo fuegos artificials. De cabo quan, bell filipino te s'amanaba ta ufrir-te droga, pero no le'n digatz a Durerte, que de seguras que no sabe que os ricos (son os que más) se drogan! Y tamién bella prostituta t'ufriba os suyos servicios, cosa curiosa, pos Filipinas tiene a inchusta fama de paradís sexual, y en realidat a prostitución se troba en as partis occidentals y ricas, y as prostitutas son foranas u filipinas que han renunciau a os suyos orichens. Pero quasi no se troba prostitución entre as clases medias y pobres, en buena mida por o fundo sentimiento relichioso. Con tot y con ixo, tanto de drogas como de prostitución, en Boracay no te'n trobas más d'a que te puetz trobar en Benidorm, asinas que no cal estar inchustos quedando-se con ista ideya -o curioso ye o contraste con as Filipinas de clase media y pobre.

Alparciando prou mientras a nueit, marché t'o leito y a l'atrol diya, dimpués de desayunar-me bien, preté a caminar por a isola. Asinas, l'interior d'a mesma yera a parti d'os filipinos, que i viviban ta treballar y ufrir servicios a o turismo, o cualo se troba más que más en a costa. Por as costas, bellas plachas chicotas -beluna privada u semiprivada, pos l'acceso ye quasi restrichiu a os clients de bells hotels- y quatre grans: a propia White Beach, que ye a principal, y Puka, Ilig-Iligan y Bulabog. Puka ye a 'placha tranquila', ta poder estar-se en auguas turquesas sin o rudio y l'ambient de White Beach, mientras que en Ilig-Iligan y Bulabog se fan os deportes acuaticos -tamién en White Beach-, destacando más que más o kitesurf. Curioso ye que en istos puestos no se troba garra ilesia y quasi no se troban estatuas relichiosas, comuns en cada cantón de Filipinas, y prou que sí, curioso tamién trobar-te con que a metat d'a población ye occidental: cuerpos blanquetz, pels royos, uellos azuls y bikinis por totz os costaus, cosa poco común entre os filipinos, que s'estiman de ficar-se en l'augua con ropa.

De tornada enta White Beach, ta veyer-la de diyas, a uno l'ufren una ripa d'actividatz ta fer en a mar: buceo, surf, kitesurf, windsurf, guiar barcos, asinas asinas. Y tot a un pre caro ta Filipinas -no ta Europa-, pos as mesmas actividatz se pueden fer en atras isolas y por un regular con millor calidat y menos agobio. Servidor se ficó en l'augua, y dimpués d'una ducha, tornó a disfrutar d'a nueit de Boracay, con mosicas y estilos ta totz os gustos: reggae, dance, house, latino... A verdat ye que ye un viache que quasi lo feba obligau, por ixo de decir que i soi estau quan sale o tema de conversación, pero a la fin me cuacó más d'o que m'asperaba, talment por as propias baixas espectativas, por no veyer-la masificada en exceso y porque tamién se troba a faltar de cabo quan estar en un ambient una mica más occidental. As mías conclusions d'iste viache se resumen en dos:

(i) Boracay ye una isola d'ambient y borina. No soi estau en Ibiza, pero l'ambient ye parellano a lo que se troba en Placha d'as Americas en Tenerife, en Salou u Benidorm. Manimenos, no ye de tot artificial, y guarda chent y formas de vida filipinas en o suyo interior, y sobre tot, encara no s'ha masificau de raso. Asinas, no trobas grans edificios que empuerquen o paisache, y mesmo os paseos maritimos son d'arena. No bi iría de propio dende atro puesto d'o mundo, pero si bells amigos vienen ta Filipinas, pos no m'importaría mica d'estar-me-ie bells diyas con ells.

(ii) En Boracay s'aprecia cómo afecta a influencia occidental en a chent filipina: perdida d'a relichiosidat y d'as relacions morals tradicionals, que fan fácil -chunto con o intresau poco control d'as autoridatz en as redoladas occidentals- que negocios mal vistos en a resta de Filipinas aquí s'estendillen, como a prostitución y as drogas. Diners son diners.



15.1.18

Ent'as espelungas de Batu, Kuala Lumpur: una impostura de cartón-piedra


Dentro d'o viache a Kuala Lumpur, mención a parti mereixen as famosas espelungas de Batu, a pocos kilometros a o norte d'o centro d'a capital malaya, puesto relichioso ta hinduistas dende fins d'o sieglo XIX an que se troba a estatua más gran relacionada con ista relichión, en hunor a o dios Murugan: de seguras que bell contacto de tú en Facebook tien bella foto astí con ista famosa estatua!

Arrivar-ie ye prou fácil, pos bi ha una linia de metro-tren que a suya fin ye precisament ixa, y que esnavesa tot o centro de Kuala Lumpur. Tamién se puet ir en buses, en tours privaus y mesmo en taxis, que dicen no son guaire caros. Yo eslichié a opción metro-tren, y malas salir d'a gara, me trobé con bells monos chicotz esforigando en a basuera y barallando-se por os repuis d'una bolseta de mcdonalds. Ya acucutando a silueta d'os templetz, que son por tot arreu, en veyé muitos más, y os correspondients turistas dando-les de minchar. A ista fauna, cal adhibir-le os bars y puestos turisticos a esportons, tot ixo dibuixando y chenerando un ambient postizo y masificau. Mal prencipiaba a cursa. 

En pocos metros arrivé en as escaleras d'a espelunga principal, que enfila t'o templo de Murugan, estando ista escalera presidida por a estatua dorada antis dita. Dimpués de fer-me a correspondient foto con a estatua y de puyar os suyos 272 escalerons, i arrivé en a espelunga, y o que me trobé me decepcionó y mesmo me fació ansias: una espelunga que enantes de seguras yera repolida, con buenas anvistas de Kuala Lumpur, esboldregada y esplanicada ta fer templetz de cartón-piedra -continan fendo-se-ne-ie-, milentas de turistas fendo fotos, rudios y dando biroya a os monos, botigas y focos de luz d'a grandaria d'os que tienen os campos de fútbol. Y o pior de tot, no pocos turistas alternativo-mochilers que parixeban estar trobando o nirvana en ixa rudiosa y fastiosa impostura, d'ixos que m'atrevería a decir nunca no pisarían una ilesia porque son muito progres. 

Con mal cenyo baixé t'a segunda espelunga, que le dicen 'a espelunga fosca' (Dark Cave), puesto natural an que, por fortuna, ta dentrar cal fer una reserva y bi dentras mientras bella media horeta en colla con un guida por a primera sección d'a mesma, pos a fin d'a espelunga no admite visitas en pro d'a preservación d'a suya fauna y d'a propia espelunga. O guida t'explica a fauna d'o puesto -más que más moriciegos, cucos y arainas- asinas como as formacions cheolochicas tipicas d'as espelungas de grepes. No ye mala visita, a verdat, sin estar tampoco una maravilla. En o mío caso, una colla de ninos maleducaus y pais soznormals no nos dixoron disfrutar de tot d'ista espelunga, tot y que a resta bien que les ne diciemos varias vegadas. 

Ya feita ista espelunga, baixé atra vegada os escalerons y abaixo, atras espelungas más chicotas y a o mesmo ran de tierra s'ufriban: a espelunga Villa, o museu d'a espelunga principal antis vista, a espelunga Ramayana y a espelunga Valluver Kottam. Atra vegada, imposturas de cartón-piedra, en teoría relacionadas con a relichión hindú, espelungas esboldregadas y esplanicadas, turistas alternativo-mochilers, y en bell caso, bella bestia que i heban meso t'adornar, como guites, pavos reyals, loros varios y dentro d'una espelunga, engarcholaus, reptils varios, arainas y cullebras. O pre d'as dentradas ta istas espelungas no yera caro, bien se vale. 

Dimpués de veyer todas as espelungas, de mirar-me os monos y a fauna turistica, pillé o tren ta tornar t'o centro de Kuala Lumpur. Si en cheneral a ciudat no m'heba pareixiu acullidera, en o caso d'a espelunga de Batu, a esferra feita en o patrimonio natural, o postizo y plen de mollisca qu'en ye, y l'abundancia d'ixos especimens ditos mochilers ababols que antimás creyen haber trobau a pureza d'a diversidat cultural en un puesto asinas, fació que a mía impresión siga negativa. Ta estar honestos, en a resta de cosas poco se le puet criticar a la ciudat, pero no creigo que Kuala Lumpur siga una alfaya, como en bell puesto han considerau.

10.1.18

Enta Kuala Lumpur: una ciudat una mica fulera


Por cabo d'anyo quereba fer bella cosa especial, y dimpués d'estar-me por muitos puestos naturals y rurals de Filipinas, m'aganaba de marchar ta bella ciudat y experimentar nuevos paisaches y comunidatz urbanas. Asinas que dimpués de mirar-me una mica os pres d'os vuelos t'as ciudatz d'arredol de Filipinas (Singapur, Hong Kong, Kuala Lumpur, Jakarta...) a la fin me decanté por Kuala Lumpur, ciudat con quasi dos millons de personas, con un aria metropolitana de más de siet millons y capital de Malasia, arrivando-ie o 29 y estando-me-ie por cinco diyas.

A primera sensación fue muito positiva: una ciudat an que poder fer-se una gambada tranquilament! Con un trafico moderau, con ceras esclateras y sin guaires agobios! Antimás no guaire gran, relativament escoscada y con un sistema de metros-trens-monorrails prou bueno, que te permite posar-te en qualsiquier puesto d'a ciudat d'una traza rapeda, comoda y a buen pre. Muito menos desigual que Manila, sin -tantas- escenas de pobreza cruda y sin a riqueza bambosa de bellas partis y de bells vicos. Tampoco no yera Zaragoza, pero podeba pasar ta tener o que he trobau a faltar de Manila istos meses. Atras cosas que ascape se notan son as relichions: a sociedat de Kuala Lumpur tamién ye muito relichiosa, pero no pas catolica sino musulmana, como se puet notar en os velos d'as mullers u en as continas oracions d'os altavoces d'as carreras y en as continas mezquitas, y, encara que a mayoría d'a población ye musulmana, tamién s'aprecian minorías mica chicotas de chinencos, hindús y occidentals, os zaguers tanto turistas como de negocios. Isto se refleixa en a gran cantidat de templos -beluns nuevos y atros con más d'un sieglo- de relichions chinencas -china tradicional, budista, taoista...-, hindús y cristianos.

Asinas, m'aloixé en un hostelet en o vico de Titiwangsa, fueras d'o centro d'a ciudat pero no guaire luent, podendo acerca-me-ie a piet. Habié d'asperar-ie una hora ta fer o check-in, pos l'amo yera marchau t'a mezquita. Dimpués de dentrar en a mía cambra-guariche, una d'as primeras cosas que facié fue fer una gambada ent'os puestos d'o centro, esnavesando primero o popular vico de Chow Kit. Iste vico tiens dos partis deseparadas por l'avenida Sultan Ismail: a un costau Lorong Haji Taib, una d'as partis más pobres y conflictivas d'a ciudat con negocios de rastros, drogas y prostitución -pero se podeba fer una gambada por astí sin problemas, o menos de diyas-, y a l'atro costau una parti muito más rica y animada, a rebutir de negocios y centros comercials musulmans -más que más de ropas.

Pasau o Chow Kit, trobamos o que le dicen a parti colonial d'a ciudat -pos Malasia s'independizó d'o Reino Uniu en 1957- con bells edificios y parquetz pinchos en a confluencia d'os ríos Gombak y Klang, sobresalindo d'entre totz ells a mezquita de Jamek, una d'as más antigas d'a ciudat, bien gran y polida, y o edificio Sultan Abdul Samad, siede d'o gubierno britanico y agora mesmo siede d'o Ministerio d'Información, Comunicación y Cultura. En ista redolada se declaró y celebró a citada independencia, y agora mesmo fa un vico piatonal an que disfrutar d'una buena y tranquila gambada urbana. 

Dimpués de veyer a parti colonial, continando ent'o sur a bells pocos metros se troba o prencipio d'o vico chino, con o mercau central de Kuala Lumpur. En istas carreras trobamos o tipico d'un vico chino d'una gran ciudat: choyerías, botigas d'imitacions, restaurants de comida chinenca, supermercaus chinencos, y prou que sí, turistas a brozuecos. Una zona con muita vitalidat, y con buena cosa d'as suyas carreras piatonals, que aporta prou a la ciudat. Como curiosidat, bi ha bells templetz chinencos, y tamién trobamos aquí o Sri Mahamariamman (zaguera foto), o templo hindú más antigo d'a ciudat, prencipiau en 1873, encara que a suya vistera torre data d'o 1968. Ye prou poliu y de dar -y de gufanya- fer-le una visiteta, t'o qualo t'habrás de sacar os calcers.

Tras veyer o vico chino, m'enfilé enta Bukit Bintang, probablement o vico más popular d'a ciudat. Si Chow Kit yera un vico más musulmán, o centro yera colonial y a plego se trobaba o vico chino, personalment diría que Bukit Bintang ye o vico occidental. Pubs, hotels y puestos 'sospeitosos' de masaches a embute, bells rascacielos de negocios arredol, bell graffiti/performance moderneta y tot arredol d'a carrera Alor, an que asabelo de restaurants y de puestetz de carrera ufren biroya y bebidas a os turistas y occidentals de negocios que se i trobaban a boticiegas. Un servidor tornó a fer-se sucos de canya de zucre a palladas, pero no pas con calamansi -pos en Malasia ixe citrico no pareix tan popular- sino con limón u con fruita d'a pasión.

No guaire luent de Bukit Bintang se troba o principal atractivo turistico de Kuala Lumpur: as torres Petronas. Con 452 metros, fuoron os edificios más alters d'o mundo dica o 2004, quan s'inauguró a Torre Taipei 101 -agora en ye o Burj Khalifa de Dubai. Prou que ye de dar fer-les una visita -en a que puyas prou alto, veyes toda a ciudat y a redolada, y en a que tamién te dixan fer una gambada por o puent que achunta as dos torres. Pero no nomás ye de dar visitar as torres, si no tot o que s'ha desenrollau arredol: o esparpallant centro comercial de Suria, un parque con un lago bien pincho, bellas carreras con pubs y restaurants que gosan de frecuentar os occidentals y que le dan muita vida, y l'aquario. Un servidor l'adedicó tot un diya, y tamién i fuo ta celebrar o cabo d'anyo 2017-2018. D'atra man, istas torres son o perfecto simbolo d'o denserrollo economico de Malasia derivau d'a explotación d'o petróleo a traviés d'a interpresa estatal Petronas, bien conoixida por os suyos patrocinios en Formula 1. De feito, ye común trobar en as torres, y por un regular en todas as carreras de Kuala Lumpur, referencias a o equipe de Formula 1 de Mercedes, y o zaguer que i penchoron en as pantallas antis d'a cuenta atrás t'o 2018 fuo un mensache de felicitación de Lewis Hamilton, poco menos que un heroe nacional.
Y entre as cosas a veyer, ta rematar, pos no ye de más fer-se una gambada por os principals parques d'a ciudat, más que más parando cuenta d'os pocos que bi'n ha en Manila. Asinas, o principal parque ye o de Perdana, an que se troban chardins botanicos, un parque con ciervos, atro d'orquideas, estatuas-monumentos y tamién un parque de birabolas y unatro d'aus, istos dos zaguers de pago ixo sí. O puesto ye muito tranquilo, encara que recomiendo visitar-lo un diya que no faiga sol, pos si no, con a calor d'ista ciudat tropical, o que ye una chornadeta tranquila puet a la fin esdevenir literalment en un infierno. Tamién visité o parque de Titiwangsa, pos me quedaba a o costau de l'hostalet an que dormiba: no ye mica turistico, pero ye igualment recomendable, pos ye bien cudiau y dende o suyo lago se pueden acucutar totz os rascacielos d'a ciudat. 

Como conclusión, Kuala Lumpur ye una ciudat muito más occidentalizada que no Manila. En primeras la pillé con muitas ganas, pos o trafico ye aguantable y uno puet andar andar y andar por as suyas carreras -mesmo arrecorrer a piet totz os principals puestos. Manimenos, en o títol d'o post digo que ye una mica fulera: a qué fin? Pos bueno, personalment no me trobé con una chent guaire hospitalaria ni educada: no saber decir 'ola', 'gracias' u 'adios', mirar-se de colar por totz os puestos, foter gargallos por qualsiquier costau d'a carrera fendo rudios que mesmo te permitiban entrefilar si teneban malminchandor en o vedau, foter bell empentón a la minima... A la fin, rematé canso d'a ciudat. A tot isto s'achunta o turismo "guayón" y alternativo-gilipollas que trobas por toda la ciudat, pero d'o que charraré más en a proxima entrada, adedicada a las espelungas de Batu.

Pero tot isto tenió un resultau positivo: valuro -encara más- Manila y Filipinas, pos dimpués de cinco meses ya yera prencipiando a centrar-me masiau en as cosas malas -o trafico y a desigualdat- y ixuplidando as buenas -toda la resta y más que más a suya chent. Tornar ta l'aeropuerto de Manila y trobar-me con un guardia de seguridat u con un taxista que t'aculle con una sonrisa, te prencipia a racontar a suya vida y s'intresa por a tuya, quasi parixendo parti d'a tuya familia, no tien pre.