10.12.17

Enta Ternate: placha y en busca d'o chabacano


Iste cabo de semana no quereba estar-me por Manila, como he feito os dos zaguers por motivos varios. Y tampoco no podeba ir-me-ne guaire luent: 225 examens finals a correchir tienen a culpa. Asinas que ista vegada sí, he decidiu marchar ta Ternate.

Ternate ye una localidat de bells 23.000 habitants que no ye que a bells 70 kilometros de Manila, lo que se traduz en bellas 2-3 horas quan bi ha entrascadas, ye decir, quasi
siempre. Iste ye uno d'os dos lugars d'a isola de Luzón -l'atro ye o barangay u vico de San Roque en a ciudat de Cavite- an que se charra chabacano, luenga criolla castellana, en iste caso influenciada por o tagalo más que más gramaticalment. Tiengo una alumna que ye d'iste lugar y charra chabacano, y o pareixiu con o castellano fa que si charramos lento nos podamos comunicar. En primeras heba pensau en decir-le que iba a ir-ie, ta que m'introducise a chent que fable chabacano, pero dimpués pensé que ta una primera exploración millor ir a l'aventura :-)

O chabacano tiene muita vitalidat en a ciudat de Zamboanga y arredols, en a isola de Mindanao, pero no pas tanta en a resta d'os puestos an que se puet trobar. De feito, mirar
d'ascuitar chabacano en Ternate sería quasi como mirar d'ascuitar aragonés en a más grant parti de puestos de l'Alto Aragón, si no fuese porque aquí a chent ye muito más ubierta y si en demandas directament, te charran u te meten en contacto con belún que en charre. O chabacano de Ternate s'esferencia d'a resta de chabacanos en que tiene muita influencia portuguesa, pos a población d'iste lugar estió marcada por migracions castellanas, y tamién portuguesas, procedents d'as Molucas. En o video, se puede parar cuenta d'ista influyencia portuguesa en rematanzas en u, i [pleitu, salvaji] u en as frases dende o minuto 1:48 [el ma mhiju sabe platicar chabacanu / todo lo que faiá...].

Tras fer una primera gambada por o lugar, y mirar d'ascuitar una mica de chabacano -con exito radiu-, pillé un tricycle que en 10 minutetz me levó ent'os puesto d'os beach resorts, hoteletz-camping de placha paradisiacos, que son capables d'achuntar cosas de difícil trobar u bien caras en países occidentals, con atras cosas muito más humildes, y en qualsiquier caso, a muito buen pre. Ya quasi de nueitz, me pillé una cabanyeta en primera linea de placha -sí, ixa toballa d'o peix ye de yo- y me fiqué por primer vegada en l'augua, que no yera a millor de todas en estar encara en a redolada d'a bahía de Manila, pero que encara asinas feba honra, y permitiba disfrutar d'a tranquilidat y poder aliviar aire puro. Y dimpués, ixa mesma primera nueit, torné t'o
centro de Ternate en atro tricycle, an que estié bell par de horetas veyendo o lugar y tanteando a -radida- presencia d'o chabacano. Chusto yeran en fiestas d'a inmaculada concepción, asinas que podié veyer a tot lo lugar celebrando y festechando más que más en a colonial plaza d'o lugar, con una ripa de críos, bella biera por astí -encara que muito pocas- y mesmo una charanga en a carrera tanyendo o paquito el chocolatero! -probablement, a cosa más espanyola que veyé en o lugar.

Poco dimpués torné y dormié en o mío guariche-paradís. Y a l'atrol diya, malas puyar-ie, me fiqué en l'augua d'a placha y dimpués de disfrutar-ne un buen rato, torné t'o
lugar ta fer una exploración más funda. Charré con varias personas en chabacano y a una d'ellas le facié un video -o video d'alto. Tamién facié gambadas por as ilesias y por todas as carreras varias vegadas, pos o lugar, tot y que tien 23.000 habitants, ye chicot y en media horeta se puet arrecorrer de cabo a rabo (en Filipinas l'aglomeración y a percepción d'os espacios ye d'una traza que fa que tot siga más preto, pero d'isto charraré en atro post). O lugar tiene como parti más important a ilesia y a plaza central, colonials, pero tamién choca que o livel adquisitivo ye más altero que no en a media de Filipinas, si bien tampoco no plegan a estar ricos u de ritmo occidental: se veyen buenas casas, no bi ha tantos cans y os que s'i veyen no gosan d'estar arguellaus, a chent no te se queda mirando fito-fito tantas vegadas como fan con os foranos en os puestos más pobres, mesmo me trobé con un occidental en o cabo de semana, previsiblement acomodau con una muller filipina. Mesmo diría, encara que aquí a lo millor me lo soi flipando, que un porcentache no curto d'a población presentaba rasgos menos asiaticos que no en o común de Filipinas y parixeban más bien latinoamericanos.

Sobre o chabacano, que chunto con o disfrute d'a placha y relaixación con tantos examens a correchir y tanto fumo en Manila yera o motivo d'a cursa, quito as siguients dos conclusions:

(i) Se diz que alto u baxo o 30% d'a población de Ternate charra chabacano, lo que serían
arredol de 7.000 personas. Con tot y con ixo, a mía experiencia ye que a luenga común en a carrera ye o tagalo, y en o caso d'as cheneracions más chovens -menos de 15 anyos-, a luenga ye l'anglés. O chabacano lo ascuité sin demandar-lo entre os conductors de tricycles y bells botiguers, treballos que gosan de corresponder a chent pobre. A mía intuición ye que ista, como toda la resta de luengas de Filipinas -talment fueras d'o cebuano- son en peligro de disparixer debant d'a presión d'a luenga nacional, o tagalo -muitas vegadas dito por ells 'filipino'- y de l'anglés.

(ii) En a carrera, s'advierte a presencia d'o chabacano en os nombres d'os puestos: tanto carreras u mesmo edificios publicos, como estableiximientos u botigas privadas. Encara que a presencia hispanica en istos sentius ye común en tot Filipinas, aquí se nota más gran. Y mesmo en a plaza d'o lugar bi ha bella plaqueta con bella inscripción en chabacano.

(iii) Por o que diz l'hombre en o video sobre o suyo fillo y a facilidat que tien de comunicar-se con espanyols y italianos, y por o que me comenta a mía alumna, no descarto que parti d'o poder adquisitivo d'a ciudat penda de rentas de chent que tiene treballos en os que charrar chabacano y poder comunicar-se con atras luengas romances y aprender-las con facilidat siga una abantalla. Con tot y con ixo, isto no ye que una intuición.

En resumen, mirar de trobar o chabacano en Ternate ye quasi como mirar de trobar l'aragonés en a más gran parti de puestos de l'Alto Aragón, con una esferencia: en l'Alto Aragón muitas vegadas has d'ir con un contacto que te introduzca a la chent local, aquí son muito más ubiertos y si les ne demandas, ascape te presentan a belún que lo charre. Encara sin emplegar o gancho de l'alumna que he mencionau, he puesto entrar en contacto con a luenga.

27.11.17

Os igorotes de Sagada: espelungas y os atabuls colgants d'a Val d'Echo


Dimpués d'a cursa de Banaue, pertocaba la segunda parti d'a semaneta de vacanzas por as montanyas d'a Sierra Madre: marchar ta Sagada, un lugar de bells 12.000 habitants, que os suyos nativos se dicen igorotes, y que son emparentaus, pero no os mesmos, con os ifugaos de Banaue. Ta ir-ie dende Banaue, pillé una furgoneta con atros turistas norteamericanos y un checo ent'o lugar de Bontoc, y astí pillé un jeepney enta Sagada. Veyer a os atros turistas pillar un jeepney autentico de filipinos, a rebutir y an que a chent mesmo se'n puyaba en o teito por difueras, y veyer os cenyos que meteban istos turistas, no teneba pre.

Sagada ye famosa en estar probablement a localidat más turistica de toda la montanya d'o norte de Luzón, en poder fer gambadas por o mont, espelungas, actividatz d'aventura varias y, más que más, por os suyos costumbres y ritos funerarios que l'han dau visibilidat en tot o mundo. Asinas, se podría decir que ye una mena de Morillo de Galligo filipino anque 'apedecan' a os suyos muertos de trazas una mica raras. Curiosament, Sagada ye entre pinars fendo un paisache de media montanya que fa muita alcordanza a puestos peninsulars. Malas plegar-ie a ixo d'as cinco d'a tardi, o jeepney nos dixó quasi en a puerta d'a oficina de turismo, an que son os guidas que monopilizan as opcions y ufiertas d'actividatz a fer, atra vegada suposando ixo más avantallas que contras y sin perder por ixo guaire o esprito de ''pureza'' d'as actividatz, ye decir, sin vender-te un producto turistico enlatau. Istas actividatz se resumen más que más en quatre menas: espelungas, cascadas, Echo Valley y os suyos atabuls colgants y as gambadas por o mont. Como cascadas y güergas bi ha arrienda por totz os costaus d'istas islas y como ya levaba tres diyas de gambadas en Banaue, me centré más en o famoso Echo Valley d'os atabuls colgants y en as espelungas.

O checo -Vlastimil- y yo pillemos a cursa "completa" d'as espelungas ta fer a l'atro diya -ixe mesmo diya ya yera masiau tardi- y dimpués pillemos una cambra doble en o lugar, bien cerqueta d'a propia oficina de turismo an que yeran os guidas locals y an que prencipiaban todas as actividatz: a verdat ye que haber trobau as Vlastimil m'ha feito cabidar buena cosa de diners, porque as cursas tienen o mesmo pre sigas uno que diez, y as cambras o mesmo. Y d'atra man, ell yera una persona feita a ista mena de cosas, mica patantona, por o que feba goyo de marchar con ell.

Dimpués d'isto, me facié una gambada por o lugar, y ascape paré cuenta que ye un lugar turistico y con más diners que no a media d'a resta de Filipinas: isto se veye ascape quan uno se mira lo recios u arguellaus que son os cans d'a carrera, y cómo van vestius os ninos. Manimenos, de tot o turismo que bi heba, a metat alto u baixo yera propio filipino, mientras que o turismo occidental respondeba a un perfil choven, mochilero y aventurero, por o que l'ambient yera prou esferent a lo que se trobaba en El Nido.

Ya a l'atrol diya, a ixo d'as nueu d'o maitín, prencipiemos a cursa -a la que a zaguera hora se i apuntó un neozelandés- d'as espelungas, que recorre un sistema karstico prencipiando en a espelunga de Lumiang y salindo por a de Sumaguing, con aproximación a piet y un guida muito simpatico dito Agu. En media horeta de gambadas por casas y selvas pleguemos en a espelunga de Lumiang, que a suya entrada ye a rebutir de atabuls, por tierra os repuis d'atabuls caitos y crebaus, y huesos humanos. Un espectaclo que si uno marcha ta Filipinas cal vayer. D'atra man, mientras i dentrábanos pisé bell par de uesos humanos sin querer, encara que uno d'ells ya yera quasi esboldregau de tanta chent que lo heba pisau.

A cosa en a espelunga de Lumiang prencipió bien, pero no fació so que amillorar. Dimpués de una u dos horas de trampos de baixada prou peligrosos alumbraus con una lampara de queroseno que levaba Agu -atra vegada, no sé cómo ufren ixa cursa a turistas sin conoiximientos d'espeleolochía, con gleras y clamors internas de decenas de metros y trampos envolicaus: se la chungan una ripa- pleguemos ta un puesto de guargas y piscinas naturals, con una temperatura d'augua aceptable, y prou que m'i fiqué. D'atra man, ixe maitín a ixas horas no yéranos que siet turistas por todas ixas espelungas kilometricas, y o guida nos levó por buena cosa de puestos que en primeras no yeran incluitos en a cursa. Asinas que millor imposible. Dimpués de capuzar-me-ie, marchemos china chana ent'alto, con a companyía visual y sonora d'os amigos moriciegos que volaban quasi fendo una boira, y pleguemos enta parti d'a espelunga de Sumaguing, con una ripa de badinas y güergas internas, y ya con más turistas pos ista espelunga, de fácil acceso, ye a que os guidas ufren en a opción curta d'espelungas. En pocas parolas, aquello yera o paradís d'as güergas y badinas baixo tierra. Dimpués d'ixo, tras quasi cinco horas baixo tierra, saliemos por a boca d'a espelunga de Sumaguing y tornemos china chana y bien contentos ent'o lugar de Sagada. O guida nos advirtió de duchar-nos antis con antis, pos ixas auguas levaban muito acido. 

A l'atrol diya, Vlastimil y servidor decidiemos de pillar a cursa luenga de Echo Valley, anque se troban os famosos atabuls colgants -en reyalidat son esparricaus por totz os vallons d'a redolada, pero en Echo Valley son anque millor se veyen, y d'atra man tamién preservan una mica a resta d'atabauls, focalizando o turismo en ista parti. A cursa luenga s'esferencia d'a curta y d'a media en que arrecorres a resta d'a Val d'Echo, pasando por rozals, selva, o río y bella güerga, con un trampo subterráneo de bells 500-1000 metros, pincho, pero ya no sorpredent dimpués d'haber feito a cursa d'as espelungas o zaguer diya y d'estar estau en o río subterráneo de Puerto Princesa, Palawan. Antiparti, ista vegada nos heba pertocau un guida más rebordenco. A fin d'ista gambada ye precisament o principal puesto ta veyer os atabuls colgants -encara que como he dito, son por totz os costaus: en iste zaguer puesto, no guaire luent d'o lugar de Sagada, los tiens tan a man que mesmo los puetz tocar -pero prou que cal tener respeto.

Ta rematar, cal decir que os costumbres de colocar os atabuls en paretz u en as dentradas d'as espelungas responden a la creyencia prehispanica de que les ha de dar a luz solar ta facilitar a reencarnación. Si bien, con o cristianismo isto s'adaptó: cal que les de a luz solar ta que puedan marchar fácilment t'o cielo. Hue en diya, bells igorotes encara continan estando apedecaus d'ista traza, mientras que atros trigan o ritual cristiano en o fosal d'o lugar. Pero mesmo en istos zaguers casos, bellas fuesas tienen finestretas u lucanas con un veire ta que pueda dentrar as lumbres d'o sol en l'atabul.

Dimpués d'isto, a piet marché t'a gara esnaveando os tipicos mercaus filipinos de biroya, trastes y ropas d'o sabado de maitins y pillé o bus ta tornar ta Manila. Ista vegada m'asperaban 13 horas... Como curiosidat, chusto antis d'a tornada veyé cómo una colla de turistas una mica fachendosos y viellos -y más que más una viella chonfla- se carranyaban con os guidas d'a oficina de turismo porque no les dixaban fer a cursa grant d'as espelungas... Oi ababols! Si sabesen lo que yera ixa cursa de seguras que no s'hesen meso tan farutes y fuesen estaus una mica más humildes.

En resumen, si Palawan y o río subterráneo de Puerto Princesa son una d'as siet maraviellas naturals d'o mundo, y si Banaue-Batad ye patrimonio d'a humanidat seguntes a UNESCO, Sagada, y más que más as suyas espelungas y ritos funerarios, ye muito millor! Creigo que ye o millor puesto an que mai soi estau


19.11.17

Enta Banaue, Cambulo y Batad: nativos Ifugaos


Ista semana, inasperadament y gracias a la cumbre de l'ASEAN (Asociación de Nacions d'o Sureste Asiatico) y a la decisión de Duterte de fer vaca por ista trobada, he librau. Asinas que he aproveitau y soi marchau a fer una d'as rutas que dicen no cal perder-se en Filipinas: os rozals de Banaue, Patrimonio d'a Humanidat seguntes a UNESCO dende 1995, y os ritos funerarios de Sagada, en a rechión de Cordillera. Dicen, y con buena razón, que ta fer tot isto cal adedicar lo menos cinco diyas. En iste primer post charraré de Banaue, y a popular ruta de tres diyas entre as montanyas d'os Ifugaos -os nativos d'ista rechión- fendo nueit en o lugar de Cambulo y plegando en Batad.

Ta ixo, o lunes pillé o bus ta Banaue en a gara de Sampaloc de Manila. En primeras, quereba pillar-lo o domingo, pero no bi heba tickets, asinas que no quedó atra que marchar-ie o lunes. O bus sale a las 9:00 d'a nueit y bi plega a las 6:00 d'o maitín, nueu horas de viache que ya de por sí fan que ista cursa se faiga una vegada, pero no sé si guaires más.

Malas plegar en Banaue, os guidas locals -que cal decir que en Filipinas son publicos,
quasi obligatorios, monopolizan a ufierta turistica con pres estableixius, cusiran una mica o medio ambient y tot ixo suposa muitas abantallas- ya t'amostran todas as posibilidatz, que más que más en son tres: fer una breu vesita t'os rozals de Banaue y Batad mientras un diya, fer una ruta d'una nueit y dos diyas, u fer una ruta de dos nueitz y tres diyas esnavesando toda la val. Ya que m'heba fotiu nueu horas de viache en bus, que no sé si tornaré a foter-me-las y que teneba tiempo de sobra, pos pillé la de tres diyas, esnavesando a sierra dende Banaue dica Batad pasando por Cambulo. Cal decir que mientras ixos tres diyas no bi ha garra cobertura, estando de raso incomunicau. 

Asinas, prencipiemos a ruta a las nueu d'ixe mesmo maitín, con o guida y una colla de cinco personas, checos y franceses, una ruta que dicen ye de seis u siet horas, pero que seguntes a colla -como la que me pertocó a yo- puede estar mesmo de ueito u nueu. En primeras, o camín yera de fácil seguir, y entre ixo y que no m'aganaba guaire d'estar con atros turistas fatos y fachendosos, pos no yera guaire convenciu d'haber trigau a forma correcta de fer-la, pero yera l'onica. Asinas, mientras as tres-quatre primers horas, puyas t'un mont dito Pula, anque apareixen os primers rozals tras los dixaus dezaga en Banaue. A puyada ye curiosa, porque prencipia entre pinars en selvas que parixen mediterráneas, ta china chana ir fendo-se más humeda predominando vechetación d'augua, y más que más as felequeras. Pero en qualsiquier caso, o terreno no pareix de tot desconoixiu y fa alcordanza a rutas que pueden fer-se por o Matarranya y o Prepirineo

Ya en a segunda parti d'ista primera chornada, paras cuenta de que no yes en Aragón y de que cal pillar un guida ta fer-la. En a baixada d'o mont Pula se veyen os primers rozals (foto) y concarando o camín ta Cambulo, o lugar anque facié a primera nueit, cal pillar una ripa de alcorces, vías y ir por camins de piedras que esbarizan y marcan as escaleretas d'os rozals, con caitas que van dende o medio metro dica quasi o centenar de metros, y sin garra seguridat. Una colla de turistas checos que heban trigau de fer-la por a suya cuenta, sin guida y nomás con l'aduya d'o GPS, poco menos que yeran plorando y firme goyo les fació de trobar-nos a nusatros con un guida que, como buen filipino, les ufrió toda la aduya que podió. A impresión, sin dubda, en fer ista cursa uno se la chuga y muito.

A dos horas de Cambulo, pretó a plever y una firme tronada fació tot muito más embolicau: fer equilibrios entre piedras que esbarizan una ripa con clamors de decenas de metros fa cerina. Antimás, caleba esnavesar un puent colgant de bellas decenas de metros d'altaria con os tensors verticals crebaus y con a superficie feita con placas metalicas que, en metat de l'airera y a plevia, esbarizaba y se moveba cosa mala -yo lo pasé de chenullos. A cara de preocupación d'o guida, de 50 anyos y natural d'a val, encara aduyaba menos. He de confesar que lo pasé muito mal, y en plegar ta Cambulo, l'aconsiguié quitar a o guida cifras d'accidents en ixa cursa -en primeras, no me las quereba decir: media d'un muerto por mes y d'un accident por semana en puenda baixa, muitas más de veranos u nadal. O zaguer muerto: o pasau chueus un koreano. Seguntes o guida, yera a culpa d'o koreano por pisar anque no debeba... Me quedé más tranquilo... Ixo explicaba tamién a graniza base d'helicopteros que teneban en un lugarichón como Banaue.

Ya en Cambulo faciemos nueit en una casa local que heban adaptau a modo de posada,
como antismás. Una cama, una ducha fría y una cena con bell plato filipino u sencillo, mientras os guidas de todas as collas que i yéranos plegaus pillaban a guitarra y canturriaban qualsiquier canta esparricada por a globalización, como lo Despacito -no cataban cantas d'Ifugaos, que se veye que no ya no son guaire de moda en a val.

Dimpués de dormir -por fin en dos días! pos en o bus poco dormié-, nos ne puyemos a ixo

d'as ueito y continemos a cursa, ista vegada enta Batad. Atra vegada, equilibrios entre rozals y clamors, encara que ista vegada sin plevia ni airera, asinas que con menos peligro. Nos crucemos muito más con os nativos ifugaos, que yeran cultivando y que gosan de mosegar moma, una mena de chicle ancestral ifugao feito con a semilla d'una planta dita betel, a fuella d'unatra planta local, cargol y tabaco, y que dixa os dients de color roya. Ye baladre y aspro, y quan fotes un gargallo dixa una buena taca roya y fastiosa por tierra, razón por a que en os lugars d'a redolada ye común trobar os cartels 'Don't split moma'. Pero antis de plegar en Batad, pasemos por a esparpallant cascada de Tappiya, de bells 30 metros d'altaria, y con una buena gorga abaixo anque prou que me fiqué, encara que caleba parar cuenta, pos a cascada fa torbellins d'augua y corrients en a gorga. De feito, mientras as zagueras anyadas tres personas han feneciu afogadas en iste puesto.

Ya en Batad, pasemos a zaguera nueit en unatra casa local adaptada. Ista pior, pos habié
de dormir con atros huespetz: cucarachas y insectos varios que me se posoron en a man varias vegadas mientras a nueit, amén d'as ulors d'o puesto... Pero feremos la d'aquell, pos, no quereba experiencia pura y autentica? Pos pilla-ne! Cal decir que o numero de turistas en Batad ye más gran, pos a carretera no ye luent, o lugar tien os rozals más polius y ye o puesto anque i marcha a chent que ha decidiu de fer o recorriu de nomás un diya. 

Dimpués d'ixa nueit y de bellas bieras con os companyers de travesía, faciemos a zaguera

etapa: a tornada, entre rozals y casas d'ifugaos, ent'a carretera de Batad anque pillemos un jeepney que nos dixaría en Banaue, puesto anque prencipiaré a segunda parti d'iste viache: Sagada, lugar que ye a bellas tres horas. Pero isto ya lo dixo t'atro post.





Como conclusions d'ista cursa, en quito varias:

(i) Encara que ye un puesto turistico y os guidas publicos monopolizan toda la ufierta, en garra momento te son dando un "producto encaixalau" u ''l'aventura turistificada''. A'l vies, a experiencia ye prou pura.

(ii) Tot y que ye un lugar turistico y Patrimono d'a Humanidat, a dificultat tecnica y dureza d'a ruta fa que no siga un puesto guaire masificau. Arredol de 30 turistas por diya plegan en o lugar de Cambulo, que tien arredol de 1500 habitants. L'altaria maxima que se pilla ye de 1800 metros y a minima de 700, pero ye un recorriu trencagarras, anque perén puyas u baixas, sin garra plano.

(iii) A val tiene una extensión parellana a la d'una val pirinenca -eix. Echo-, pero en toda ella viven quasi 15.000 personas. Y o numero de lugars y edificacions ye parellano u mesmo menor que no en una val altoaragonesa: tot ixo fa una ideya d'a cantidat de chent que viven en cada casa, más que más ninos, pos Filipinas ye en plen baby boom.

(iv) O roz cultivau ye t'autoconsumo d'a val. Isto explica por qué istos rozals, que se dicen tienen más de 2000 anyadas y que son tan duros de treballar en metat d'a montanya, encara se continan fendo servir. Como diré en (v), a posibilidat de l'acceso a un roz más fácil y barato con a carretera que se ye fendo mete en peligro ista practica y istas construccions ancestrals.

(v) A val d'os Ifugaos encara conserva a pureza. Con tot y con ixo, o feito de que plegase a electricidat fa tres anyadas, y que en breus s'inaugure una carretera nueva con as

respectivas antenas telefonicas, fa que toda ista forma de vida siga en risque. Os motivos más concretos: acceso a o roz más economico y fácil de tierra baixa, y plegada masiva de turistas, pos agora ta plegar ta Cambulo cal fer a travesía sí u sí y no ye accesible a totz, mientras que quan siga feita a carretera muitos dominguers podrán ir-ie sin más y masificar-lo. D'atra man, a población local ye lo que quiere, en suposar-les mayor riqueza y comodidat.

(vi) Si yes un turista que pasa bellas semanas en Filipinas, no te compensa fer a cursa de tres diyas, sino más bien a d'un diya: fueras d'os rozals y as custions antropolochicas-culturals, no ye una cosa guaire esferent d'o que puetz fer en muitos atros puestos muito más cercanos ta casa tuya. Isto no quiere decir que siga mala cursa ni muito menos.

(vii) Atra curiosidat ye que en ista val os nativos charran ifugao y no pas tagalo -encara que lo aprenden igualment en a escuela. En as pensions y por o camín nos dicen bellas parolas en ifugao, como 'tagay', que ye a parola que emplegan ta brindar; 'ifuco' que significa 'roz' u 'camote', que ye una mena de tuberclo de culors morau u amariello, parellano a una trunfa y que cultivan muito.

13.11.17

Enta El Nido, Palawan: lagunas, plachas, islas, buceo, lesbianas, Amarna Miller y hippies filipinos

Dimpués d'haber-me estau bell par de diyas por Puerto Princesa, y haber feito astí lo más important -que de seguras no l'onico-, pillé a furgoneta-transporte enta El Nido en un trachecto de bellas seis horas.

Lo primer que cal decir ye que si en Puerto Princesa l'ambient yera una mica esferent a Manila y en cheneral a la isla de Luzón -más turismo, atros pres, más orden y limpieza,
una conducción más "europea", millor calidat de vida, pior educación y menos cordialidat...- en El Nido a cosa ya puyaba muito más. Asinas, sin plegar a libels de masificación mediterráneos, os pres no son os comuns en a Filipinas d'os filipinos, encara que continen estando baixos ta un occidental. Yo diría que son pres parellanos a los que se troban en Asturias, Galicia, Extremadura, partis d'Andalucía u Canarias.

D'atra man, o numer de turistas -y d'entre ells buena cosa de vascos y catalans- ye bien
altero, y ye que iste ye uno d'os destinos turisticos más conoixius internacionalment en Filipinas, por o poliu d'un paisache que pareix quitau d'a pelicula Avatar y en estar uno d'os millors puestos mundials ta fer submarinismo. O perfil ye o d'o turista mochilero-decathlonero "deluxe" pero que nunca no "perdería o tiempo" en Manila en estar pobre, estresant y puerca.

Atras cosas tamién chocan y muito, como a existencia de hippies filipinos, versión local d'os hippies de l'Ampurdá, de Guara u de Ibiza que miran de vender-te quatro mierdetas
"ecolochicas y autochestionadas" a pre d'oro, que adedican o suyo tiempo libre a fer aparatos con fuegos a o ritmo d'a mosica de Damian Marley y Manu Chao levando chambretas d'o Che Guevara, que meten mal cenyo si no les dixas mica cauquerré y que dicen querer cambiar o mundo quan ni sisquiera pisan o lugarichón pleno de pobreza y miseria que tienen a dos kilometros -y mesmo churaría que istos tamién tienen buen churillo d'os pais. Más en cheneral, o cheneroso y amable trato d'os filipinos s'esboldrega en El Nido, tot y que en garra momento son rebordencos.
 

Por agora no soi pintando guaire bien o puesto, pero isto ye nomás si me centro en o social. En o natural, sin dubda, El Nido ye uno d'os puestos más polius en os que soi estau.
En sí, El Nido ye un lugar de costa, anque se veyen una ripa d'isoletas esparricadas por a mar, con plachas y lagunas turquesas amagadas y con una fauna acuatica esparpallant. En cheneral, en El Nido te s'ufren quatro cursas acuaticas, cadaguna a fer mientras tot o diya, feitas en barcos y kayak, con o chentar incluito, que cuestan arredol d'os 20 euros cadaguna y que sin dubda ye de dar fer-las. En istas cursas, i veyes plachas, lagunas, monts, selvas y espelungas acuaticas que son l'autentico paradiso. Como curiosidat, mientras yes por o puesto ye normal que bell filipino te s'amane en canoa ufrindo-te bella biera, prou que San Miguel, a biera filipina. En ista dentrada i fico bellas fotos, pos millors son as imaches que no as parolas ta fer-se una ideya de tot isto, si bien en no tener camara acuatica, ye una pena no poder amostrar os corals y os peixes de toda mena y culors que se troban baixo as auguas.

Ta rematar, dentro d'o turismo occidental, resulta curiosa a cantidat de parelletas femeninas que bi ha en o puesto, y que uno no tarda guaire en parar cuenta que son homosexuals. Encara que en os temas de chenero Filipinas ye o país más adelantau en o que soi estau, y ye común y de raso aceptau trobar parellas homosexuals masclinas, femeninas y trans por tot o país y mesmo en os firmes estamentos relichiosos, no dixa de chocar en estar occidentals. Dimpués, rechirando una mica por o rete, conoixié que mientras a zaguera anyada Palawan, y más que más El Nido, se ye convertido en uno d'os puestos turisticos favoritos d'as lesbianas occidentals que pueden permitir-se o viache. De feito, y a modo de curiosidat, ye o puesto anque a exactriz porno y caradura Amarna Miller tenió lo suyo accident de moto quan yera de vacanzas con a periodista y activista de chenero Noemí Casquet.

A la fin, dimpués de estar-me-ie bell par de diyas por El Nido y de no poder fer submarinismo
ni marchar t'a cercana isola de Corón en haber una fuerte tronada, decidié de tornar ta Puerto Princesa y pillar l'avión ta Manila, anque o millor orache permitiba de fer atras cosas en istas vacanzas de totz os santos. Pero sin dubda, mientras as anyadas que siga por istas tierras, bella vegada i tornaré ta disfrutar d'ista naturaleza -que no d'o suyo ambient social.

6.11.17

Enta Puerto Princesa, Palawan: Río baixo tierra y más


Aproveitando que a primer semana de noviembre ye festivo por istas tierras -o festivo de totz os santos- m'he feito un viache por a isla de Palawan, que dicen que ye una d'as islas más polidas d'o mundo. 

Asinas que pillé o vuelo dende Manila -bells 40€, con karaoke d'os asistents de vuelo d'Air Asia incluito- enta Puerto Princesa, capital central de Palawan, y astí que me planté. En primeras, tot y que Puerto Princesa encara conserva l'ambient propio de Filipinas, bells detalles ya t'amuestran que yes en una zona turistica, u lo menos, con millor situación economica que no a resta d'o país: carreras más escoscadas y ordenadas, una ripa de hotels, puestos turisticos ta minchar y fer-te unas bieras, atro estilo de conducción más "europeo", pres más caros que no en Luzón... 

Y como principals atractivos turisticos -u lo menos, os que yo trigué de fer- o famoso río subterráneo catalogau como una d'as siet maravillas naturals d'o mundo, a vista noctura d'as cuquetas de luz en o río Iwahig y una ruta en barco por as islas d'a Bahía Honda. 


O primer maitín marché t'o río subterráneo. Ta ixo, en una cursa que cuesta 2000 pesos (menos de 40 euros), marchas en una furgoneta mientras más d'una hora dica plegar a o primer puesto, una placha repolida anque has de pillar un primer barco que t'aproxima ent'o Parque Nacional d'o Río Subterráneo. Una vegada que plegas en o parque y bi baixas, caminas mientras bells minutos de selva -anque se troban monos- y plegas en a laguneta an que has de pillar una canoa de bellas hueito personas ta dentrar-ie en o río con un guida que ye qui s'encarga d'alumbrar y remar mientras o recorriu: i dentras mientras una milla d'o total d'o río, que tiene una extensión de más de hueito kilometros. Dentro, estalagtitas, bella estalagmita y una ripa de moriciegos t'asperan!
  
A mesma tardi, malas tornar, pillé a segunda cursa: a vista d'as cuquetas de luz en o río Iwahig, ya de nueitz. Ta ixo, unatra furgoneta t'amana ent'o embarcadero de Puerto Princesa, anque pillas un barco en una colla de bellas 20-30 personas con o que marchar t'o Iwahig, pero aturando antes en un restaurant en metat d'a mar anque uno tien un buffet libre de biroya filipina incluito en o pre -arredol de 20 euros toda la cursa. Malas cenar, uno se'n torna a puyar en o barco y marcha t'o esparpallant espectaclo de culors y luces feito or istos bichetz.  Por desgracia, a mía camara no ye prou buena como ta quitar fotos d'ista maravilla. Antimás cal decir que antis de puyar en o barco t'advierten de no quitar os barzos ni as garras a l'augua. De feito, en a popa d'o barco dos personas son cusirando de contino que no s'apareixca garra crocodilo ni garra cullebra, muito comuns por ixa redolada.

Finalment, a l'atrol diya de maitins y antis de hopar ta El Nido -d'o que feré atro post- decidié de fer a cursa d'a Bahía Honda, un conchunto de isolas y isoletz en metat d'a mar cerca de Puerto Princesa anque bi ha plachas paradisiacas. No ye mal, pero un servidor tampoco no guaire fan de masiadas plachas y quan uno marcha ta El Nido para cuenta de que puede fer cursas d'o mesmo estilo pero con plachas encara más polidas y millors paisaches.


Como curiosidat, todas as cursas incluyen chenta u cena, siempre buffet filipino. En cheneral o libel d'as cursas ye bueno, os pres no son caros y os puestos preciosos, encara que dimpués de fer-ne mientras bells 4 u 5 diyas, uno sale baldau de tanto roz y tanta biroya filipina.
  

16.10.17

Os transportes en Filipinas: jeepneys, uvs, tricycle, metro, uber-grab, taxi, buses

Tricycle

Hue somos en vaca por Filipinas. Y ye que os treballadors d'o sector d'os transportes han aturau por hue ya que o gubierno filipino quiere empentar una serie de midas ta solucionar o problema d'o trafico -un d'os más grans problemas por aquí- y muitos creyen que perderán o suyo treballo. En un país y en una ciudat anque no se vive en as carreras, sino que istas nomás son espacios de circulación y mercau, iste ye un candalieto. Asinas que, qué millor diya ta charrar d'os transportes en Filipinas? 

Prencipiaré por o más iconico y popular de totz: o jeepney. O jeepney ye una adaptación
d'os jeeps militars que trayoron os americanos mientras a suya colonización y a segunda guerra mundial. Asinas, fa as veces d'una furgoneta gran u un bus chicot an que i ''cullen'' bellas 30 personas -bien pretas y seguntes os estandars de grandaria filipinos, que ya comentaré en atro post. Por toda Filipinas, os jeepneys fan distancias medias, y en o caso de Manila, as distancias y rutas propias d'un bus. Por os laterals y en o parabrisas tienen colorius carteletz anque indican o camín que fan. Dentro, i tienen dos ringleras concaradas, an que te posas como puetz, en un ambient calient y cargau, parixendo que en una d'istas habrás de baixar-ne ta luitar contra o enemigo en o desembarco de Normandía. Os suyos motors viellos son rudiosos y continaminan una ripa, y seguntes m'han dito, encara que son un icono d'o estau, o gubierno quiere ir acorando-los china chana. Cal decir antimás que, encara que fan rutas, no tienen paradas estableixidas, sino que los aturas quan te los trobas, te'n puyas y dimpués quan quiers le dices a o conductor que quiers baixar-ne. Como curiosidat, isto en tagalo se diz 'para' -parola pillada d'o espanyol- y si quiers estar más educado, se diz 'para po' -para señor.

Una versión más moderna d'os jeepneys son os UVS. Son furgonetas que fan as veces d'o jeepney y anque i ''cullen'' bellas 14 personas, atra vegada seguntes os estandars de grandaria y de seguridat filipinos. Os UVS son más caros -bells 30 centimos d'euro o trachecto que en un jeepny ye de 15- pero tamién más comodos: quasi como taxis comunals. A suya gran avantalla, sin dubda, ye que tienen aire acondicionau. Y ixo s'agradeix una ripa en Filipinas, y más que más en Manila. Cal decir que yo nomás los he vistos en Manila, mientras que en a resta de Filipinas, ta fer ista mena de medias distancias no bi ha que jeepneys. 

Si lo que queremos ye fer aproximacions u distancias chicotas, o medio más popular ye o tricycle, como lo que bi ha en a primera foto d'iste post: una mena de sidecar que tien licencia ta saltar-se todas as normas de trafico -bueno, aquí tot o mundo tiene licencia ta saltar-se-las fueras d'en os vicos de Malate y BGC, pero os tricycles encara más. Si yes un maniatico con a seguridat, siento decir-te que iste no ye o tuyo medio de transporte. Si te fan goyo as emocions fuertes, alavez te ferás adicto a ell. 

Y Manila no tien metro? Bueno, no exactament. A ciudat ye sobre esters, galachos y
terrenos febles que ascape s'engaronan quan i pleve, asinas que a construcción de lineas de metro baixo tierra, si bien s'ha estudiau varias vegadas, perén s'ha visto inviable. Pero sí que tiene tres líneas de metro elevau -que ells dicen tren- y que fan una mena de trianglo por buena cosa de l'area metropolitana. Funciona prou bien, y sin estar o millor metro d'o mundo, ta yo ye dentro d'os estandars normals en una ciudat occidental, por comodidat, calidat y horarios. O pre d'o pasache ye d'entre 30 y 55 centimos d'euro. Agora bien, con a masificación que bi ha, en hora punta pillar-lo te puet costar arredol d'una hora d'aspera, con filas que s'esparramican mesmo por a carrera difueras d'as garas.

Y, como buena ciudat que se precie en o mundo, tamién tenemos a polemica Uber-Taxi. Antis d'arrivar-ie, y malas arrivar-ie, tot o mundo me recomendó que m'instalase Uber, y tamién una app parellana y prou popular en Asia, Grab. Y a verdat ye que funcionaban muito bien, con unos pres una mica más baixos que no los taxis, pero más que más, con a tranquilidat de poder saber quánto has de pagar antis de pillar o propio auto y con a posibilidat de fer una valoración a o conductor en l'inte -y de que ell te la faiga a tu-, bella cosa que ta yo amillora muito a calidat d'o servicio y evita os abusos. Manimenos, dimpués d'a presión d'os taxistas y de que istas companyías concedesen más licencias que no as que teneban estipuladas, o gubierno fipino las apinyoró con un mes de sanción sin poder eixercer, o que estió un caos en a ciudat. Dimpués, han tornau, pero con pres más caros y con menos licencias, o que agora mesmo fa más atractivo pillar taxis. 

Pero para cuenta! Os taxis miran d'escular-te, y más que más si yes turista. Si en he pillaus bells seis, cinco vegadas he habiu de pleitiar, bien porque te quieren cobrar o que quieren sin meter o taximetro, bien porque te quieren cobrar una tarifa base más cara -en Manila ye de bells 65 centimos d'euro, y por un regular te quieren cobrar arredol de 1.50 € si no yes espiguardau. O que quitan de treslau ye más por a tarifa base que por a tarifa de tiempo u distancia, que ye muito barata -una hora en un taxi ye menos de 6 euros-, asinas que malas que apanyas a tarifa base, no t'en has de fer, pos o propio taxista ye o principal intresau en que i arrives antis con antis.

Cal decir, y más que más con os taxis y os tricycles, que si bien miran de cobrar-te una mica más si no paras cuenta, y especialment a os foranos, os abusos tampoco no son esparpallants, y por un regular istos son d'un euro por alto d'o pre estableixiu, bella cosa que no ye guaire quan totz ells son muito baratos, y más parando cuenta d'a precariedat y pobreza d'os treballadors d'os transportes en particular y de muita chent en filipinas en cheneral.

Y os viaches luengos? He charrau de cómo fer viaches curtos y medios, pero no d'os luengos. Pos bien, si quiers bochar-te por a isla de Luzón, a traza común de viachar ye o
bus. Bi ha una ripa de companyías de buses, y por un regular istas se concentran en tres redoladas d'a ciudat -Cubao, Pasay-Buendía, Sampaloc. Os buses son como los que puetz trobar por Europa, si bien de cabo quan meten l'aire acondicionau muito fuerte -mesmo t'obliga a pillar-te un chambergo!- u peliculas y cantas filipinas a tot meter. Os pres son muito baratos: por un regular, a un euro por hora de trachecto. Aquí no bi ha buses urbanos, fueras d'as lanzaderas que te levan ent'os aeropuertos. Tamién bi heba un tren que recorreba buena cosa d'a isla de Luzón de norte a sur, pero a falta de mantenimiento ha feito que buena cosa d'os tramos s'esboldreguen, y hue no ye operativo que en os troces arredol de Manila, fendo de tren de redolada. 

Ta rematar, ta viaches luengos entre islas u a la partis norte y sur de Luzón o común ye pillar l'avión. As principals companyías son AirAsia y Cebu Pacific Air -ista zaguera, a ryanair filipina. Tamién ufren viaches por os países cercanos y os pres son baratetz, alto u baixo como as lowcost d'Europa. Entre islas cercanas, son comuns os barcos y os ferrys. 

Pd: Tot isto s'aplica a toda Manila -y en cheneral Filipinas- fueras d'os vicos de Makati y BGC, os más occidentals y ricos d'o país, anque funcionan de trazas muito parellanas a como se funciona en as ciudatz occidentals.

9.10.17

En Zaragoza por Pilares!!! (Filipinas)


Qué fer iste cabo de semana? Pos en un ataque de nostalchia agora que prencipian os Pilars, m'ha dau por marchar ta Zaragoza. Pero no t'a Zaragoza de l'Ebro, sino t'a Zaragoza de Filipinas :)

 
A Zaragoza de Filipinas ye un lugar de bellas 50.000 personas que se troba en metat d'a
isla de Luzón, entre as localidatz de Tarlac y Cabanatuán, a o norte de Manila. Ta marchar-ie, cal pillar un bus dende Manila ta qualsiquiera d'istas dos localidatz, y dimpués ye de fácil pillar un jeepney t'a Zaragoza filipina. Yo pillé o bus ta Tarlac, pero dimpués paré cuenta que fuese estau millor pillar-lo ta Cabanatuán, porque o propio bus aturaba en Zaragoza y no cabela pillar jeepney. Pero ixo rai, fa goi igualment de puyar-se-ne en un jeepney que leva o cartel de 'Zaragoza'. 
 
Una vegada en Zaragoza, ascape uno para cuenta que ye un lugar que vive por y t'o roz. Una ripa de rozals por totz os costaus, campos engaronaus t'o cultivo, chent ixucando-lo en os costaus d'as carreteras, sacos arroclaus por tot arreu y buas asiaticos chigants carriando-los d'un costau ta l'atro. A la fin de l'horizont, ya se pueden veyer as montanyas d'o norte, atro d'os puestos favoritos d'os manilenyos por o suyo clima 'fresco' -d'entre 15 y 25 graus. 
   
  
Mientras, por as carreteras, os camins, o lugar y os suyos vicos, predominan as casas a
metat fer, guariches anque viven personas y bestiar, alternando-se de cabo quan con casas senyorials que serían o suenio de muitas personas occidentals. Y prou que se pueden veyer y ascuitar muita chent cantando en os suyos karaokes: l'afición por excelencia en Filipinas! 
Se troban por o camín muitas ilesias, belunas muito grans y nuevas, un fosal a piet de carretera, y de cabo quan, bella escuela y bell instituto. Prou que totz te se miran con curiosidat y extranyeza y os ninos te saludan! En iste sentiu, Zaragoza no s'esferencia guaire d'a resta de lugars filipinos. 
  
Y como no podeba estar menos, en una buena Zaragoza que se precie tamién ha d'haber
garrulos se celebran as fiestas d'o Pilar! Asinas, en o concello ya yera presta a pancarta y os escenarios ta bellas actuacions, encara que no bi heba guaire borina porque as fiestas se celebran más que más o día 12 y o cabo de semana venient. Mala suerte, si bien en a escuela ya yeran fendo actos os ninos chicotz, y podié veyer-los una mica. Ni que decir tiene que adoro as cantas de celebración, os cartels, o suyo estilismo y toda la resta de cosas que yeran aprestando, como buen hortera que en soi. 

Y ta rematar, ta que tos podatz fer una ideya millor de cómo ye a Zaragoza filipina, i fico bellas fotos. 

  
PD: T'os amigos teruelanos, tos intresará saber que amán de Zaragoza ye Aliaga, un lugar filipino con alto u baixo 50.000 habitants y que tamién vive d'o roz :)